1 Ya inalin goh Apo Dios di,
2 Hiya ya adina it'u' unu olto'olton di hapitna
3 Ya adina mamaon an putungon nan mipaddung hi bilaun na'uy an maptung
4 Ya adi humigan mamannod hi engganah unna tigon
5 Ya inalin goh Apo Dios di,
6 At Ha"in an Dios di nangayag ay He"a,
7 Ya awniat He"ay maniat hi matan nan nabulaw ta tummig
8 Ha"in nan Dios an madayaw,
9 Undan adiyu tigon an nipa'annungda din nahhun an inali' an awniat ma'at?
10 Olom ni' ya an amin tu'un wah nan abablubabluy hitun luta ya ikantaan tu'uh Apo Dios
11 Ya da'yun numpunhituh nan mapulun,
12 At an amin tu'u ya dayawon tu'uy amaphod Apo Dios,
13 Ti hi Apo Dios ya umat hinan mabi'ah an tindalun umuy mi'gubat an nidugah di bungotna.
14 Hi Apo Dios ya inalinay,
15 At pumpa"i' nan aduntuduntug ya nan i"itang an dudunduntug
16 Ya nan nun'abulaw ya ipangulu' didah nan dalan an agguyda eneng'engwa.
17 Mu nan mange'kod hi nitaguandah nan bulul an alyonday hiyay dayawonda ya milahhinda,
18 Ya inalin goh Apo Dios ay ditu'un holag Israel di,
19 Ti undan hay udum hi paddungnay na'abbulaw ya na'appu'it
20 Manu ti do'ol mahkay di tinnigyu,
21 Hi Apo Dios ya pohdonan mattig ay ditu'un baalnan holag Israel
22 Mu hay na'at ay ditu'un tataguna ya penloh di buhul tu'uy gina'u tu'u,
23 At undan mi'id ahan di ohan ditu'uh way na'adalnan ten na'at?
24 Undan hay mangiyabulut an polhon di buhul nan gina'u tu'un holag Israel
25 At hiyanan ipa'dam Apo Dios ay ditu'u nan nidugah an bungotnan ipa'wanah gubat,