1 ओ ङए च्ह, ह्रब-सेब तबै ल्हागिर ङए ताँ सैंर थेंन्;
2 छलस्याँ छ्याँबै घ्याँर खैले प्रल् त्हुम् बिबै ताँ क्हिइ सेब्मुँ,
3 तलेबिस्याँ फ्रें क्ल्योंप्रबै च्हमिरिए सुँउँइँले खुदु चैम्,
4 दिलेया लिउँइँ च च्हमिरि काँ धोंले काँब,
5 चए प्हले कालए घ्याँउँइँ क्युरु ल्हैदिम्;
6 चइ छ्ह योंबै घ्याँउँइँ आप्र;
7 तारे ओ ङए च्ह-च्हमिमैं, ङए ताँ थेद्,
8 फ्रें क्ल्योंप्रबै च्हमिरिउँइँले ह्रेंगो टिद्,
9 आस्याँ क्हिइ ह्रोंसए न-मिं वाब्मुँ
10 क्हिए सै न्होर स्यामैंइ चवाब्मुँ,
11 धै खिब् तबै त्हेर क्हि क्रोल् त्हुब्मुँ,
12 झाइले क्हिइ बिब्मुँ, “ओहो, ङ खै तदा ङ्हाँमुँ छान् तप्रइ,
13 गुरूमैंइ बिबै ताँमैं ङइ आङिं,
14 ङ नास तबै होल्दोंर्न फेइमुँ,
15 ह्रोंसए ङ्हेखोर्बै क्यु थुँन्,
16 क्हिए क्यौदुउँइँर्बै क्यु घ्याँजरे तले ङेयाल् पिंब?
17 च क्यु क्हिए ल्हागिर मत्त्रे तरिगे,
18 क्हिए प्ह्रेंस्यो क्हिए ल्हागिर आशिक तरिगे,
19 च म्हाँया खबै फो नेरो तोंइ धोंले
20 ओ ङए च्ह, क्हि तले फ्रें क्ल्योंइ प्रबै च्हमिरिने म्हाँयार फस्दिरिमुँ,
21 तलेबिस्याँ म्हिमैं खैले प्रब-टिब लइमुँ बिब याहवेहजी सेम्,
22 ह्रोंसइ लबै आछ्याँबै केइन दुष्ट म्हि ङोर फेम्,
23 खै तदा ङ्हाँमुँ छान् लप्रबइले च सिब्मुँ,