1 बुद्धि मुँबै च्हइ आबाइ लोदा सैदा लमा छेनाले थेम्,
2 छ्याँबै ताँ पोंबै म्हिइ छ्याँबै सैमैं योंम्,
3 खैच्हिजिले आपोंबै म्हिए छ्हर बिब् धों तम्,
4 प्ल्हेगु म्हिइ ल्हें सै म्हैलेया चइ तोइ आयों,
5 ठिक के लबै म्हिइ स्योर ताँ आपों,
6 भर लल् खाँबै म्हिइ ठिक के लमुँ, छतसि चइ लबै ठिक केइन चलाइ जोगेम्,
7 कोइ म्हि ह्रोंसने तोइ आरेलैया प्लब् प्हैंम्;
8 सै न्होरइ म्हिलाइ शत्तुरमैंए योउँइँले जोगेल् खाँम्,
9 ठिक के लबै म्हि चारबै बत्ति धों तब् ग,
10 थेब् प्हैंस्याँ प्होंगि मत्त्रे तम्,
11 छलु म्हिलु लसि खुबै सै न्होर तिस्यार्न नुयाम्,
12 आशा थेंबै सै आयोंमा सैं सिम्,
13 सल्ला आकिंबै म्हिइ नौसन् ब्येहोर्दिल् त्हुँम्,
14 बुद्धि मुँबै म्हिइ लोमिंबै ताँ छ्ह योंब मुल् ग,
15 बुद्धि मुँबै म्हिलाइ ताँनइ म्हाँदिम्,
16 बुद्धि मुँबै म्हिइ च्हैंसि मैंसि के लम्,
17 स्योलिबै ताँ बिप्रबै म्हिए फिर दु:ख खम्,
18 लोदा-सैंदाए ताँ आङिंबै म्हि फापिल् त्हुब्मुँ धै दुःख खब्मुँ,
19 ह्रोंसल् बिब् धों तमा सैं तोंमुँ,
20 बुद्धि मुँबै म्हिने प्रबै म्हि बुद्धि मुँबन् तम्,
21 पापिमैं खना ह्याले दुःखन् योंमुँ,
22 छ्याँबै म्हिइ ह्रोंसए क्वें-क्वेंमिमैंए ल्हागिर सै न्होर पिंथेंम्,
23 ङ्हाँदुमैंइ दु:ख लसि ल्हें रा-रोमैं खुमुँ,
24 च्हलाइ तार आझोंबै आबाइ च्हलाइ हेल लम्,
25 ठिक के लबै म्हिइ म्रेंन्ले चल् योंम्,