1 Xera'y, nderexarai eme xee rombo'eague re.
2 Mba'eta ha'e nunga ma nemoingove puku 'rã,
3 Nderexarai eme mborayvu ha'e anhetẽ va'e rupi reikoa aguã gui.
4 Ha'e rami vy reupity 'rã Nhanderuete nemboaxya,
5 Ndepy'a ha'e javi py ejerovia tema Senhor re ae,
6 Opa mba'e rejapoa py nema'endu'a hexe.
7 Enhemo'arandu eme ndee ae reikuaa rupi rive.
8 Ha'e rami reikoa ma ojapo 'rã nderete imbaraeteve aguã rami,
9 Emboete ke Senhor mba'emo rereko va'e py,
10 Ha'e ramo nderoguy tynyẽmba 'rã mba'emo ra'yĩgue,
11 Xera'y, endu rive eme ta'vy Senhor nemo'arandu rã,
12 mba'eta Senhor ma guembiayvu kuery pe ae 'rã ijayvu,
13 Ovy'a ete 'rã ava o'arandurã ojou va'e,
14 Mba'eta ha'e rami jaikoague repy ma prata gui ovareve,
15 Pérola gui voi ovareve 'rã.
16 Opo oiporu kuaa regua re 'arandu oguereko nderekove ombopukuve aguã,
17 Ha'e va'e tape ma iporã va'e meme.
18 Oupity va'e pe ma yvyra tekove me'ẽa hi'aĩ.
19 O'arandua rupi Senhor yvy onhono raka'e,
20 Opa mba'e oikuaapa va'e vy yy ombovu raka'e yvy guýry oĩague gui,
21 Xera'y, emboyke eme rexaa py remoĩ va'ekue,
22 Mba'eta nenhe'ẽ pe ome'ẽ 'rã tekove,
23 Ha'e rami vy tape rupi reikoa rupi voi reiko porã 'rã,
24 Renheno ta ma vy nderekyjei 'rã,
25 Enhemondyi eme mba'emo oiko xapy'a teĩ,
26 Mba'eta Senhor oĩ 'rã ndere ou va'e jokoarã,
27 Eipytyvõ e'ỹ eme ojexavai rei'i va'e kuery,
28 Xapy'a rei aỹ ma voi mba'emo rereko ri vy
29 Enhembopy'a eme neirũ re rejapo vai aguã,
30 Nda'evei joupe ndeayvu ete-ete aguã mba'eve py e'ỹ,
31 Erovy'a rei eme ojerovia rei va'e,
32 mba'eta Senhor ojeguaru heko vai va'e gui,
33 Senhor ijayvu vaiague opyta 'rã heko vai va'e ro re,
34 Mba'eta ha'e ojojai 'rã ojojai reia rupi ikuai va'e,
35 Hi'arandu va'e omboetepy 'rã ikuai,