1 Xera'y, xeayvu rejopy vy,
2 'arandua re rejapyxaka pota vy,
3 xapy'a rei ne'arandurã re rejapukai vy,
4 ne'arandurã reka reikovy vy prata oeka va'e rami,
5 ha'e rami vy 'rã reikuaa Senhor renonde rejererokyjea rupi reiko aguã,
6 Mba'eta Senhor ae ome'ẽ 'arandurã,
7 Heko porã va'e kuery peguarã omoĩ porã 'rã 'arandua anhetẽ ete va'e,
8 Opena porã 'rã teko porã rupi ikuai va'e re,
9 Ha'e rami vy reikuaa 'rã teko porã rupi reikoa, mba'emo re reikuaa potaa, ha'e joo-joo'i rami rejoguereko aguã.
10 Mba'eta ndepy'a re oĩ 'rã ne'arandurã,
11 Ha'e ramo 'arandua opena 'rã ndere,
12 Ha'e rami vy ndereraa jepe aguã tape vai rupi ikuai va'e gui,
13 teko porã gui ojepe'a vy
14 Ha'e kuery ma teko vai ojapo vy ovy'a rei 'rã,
15 tape karẽ rupi ikuai vy
16 'Arandua ndereraa jepe 'rã kunha itavy rei va'e gui voi,
17 Ha'e nunga ma oeja 'rã kunhataĩ guive ome reve joguerekoa gui,
18 Mba'eta ha'e va'e ro katy reo vy manoa katy ae 'rã reo.
19 Ha'e ramo ha'e va'e kunha pou vy oo va'e ma ndojevyvei 'rã,
20 'Arandua rupi vy reiko 'rã avakue heko porã va'e ikuaia rupi,
21 Mba'eta yvy pyau ma heko porã va'e peguarã itui,
22 Ha'e rã opa marã heko va'e kuery ma oipe'apaa 'rã yvy gui,