1 Eroangeko rei eme avakue heko vai va'e ikuaia,
2 Mba'eta ha'e kuery ma opy'a re omoĩ 'rã jojukaxe aguã,
3 'Arandu rupi vy jajapo 'rã nhanderorã,
4 Jaiko kuaa vy 'rãe opy ja'o'i ha'e javi rupi nhamonyẽ
5 Imbaraete va'e gui hi'arandu va'e ipo'akave,
6 Mba'eta jaikuaa pota vy 'rãe joe nhapu'ã kuaa,
7 Hi'arandu e'ỹ va'e pe haxy ete 'rã 'arandu oikuaa aguã,
8 Teko vairã re rive onhembopy'a va'e pe ma
9 Hi'arandu e'ỹa rupi onhembopy'aa ma jejavya meme,
10 Rejexavaia ára py nekangy ri vy ma
11 Peepy pota ke omano aguã katy heraa va'e kuery,
12 Xapy'a rei aipopeje 'rã: “Ndoroikuaai va'ekue rima”,
13 Xera'y, he'u ke ei, mba'eta nemoexaĩ 'rã,
14 Ha'e rami ae avi 'arandu voi nemoingo porã 'rã nenhe'ẽ py.
15 Ndee heko vai va'e, nda'evei rema'ẽ mbegue aguã
16 mba'eta heko porã va'e ma sete-kue ho'a rire teĩ opu'ã ju 'rã.
17 Nderovaigua ho'a ramo nda'evei revy'a rei aguã,
18 ndereko Senhor oexa vy ndojou porãi vy
19 Mba'emo vai apoa kuery káuxa eiko eme nda'evei reia rupi,
20 mba'eta heko vai va'e renonderã ma iporã va'e'ỹ,
21 Xera'y, eiko Senhor ha'e huvixa kuery renonde rejererokyjea rupi.
22 mba'eta ha'e kuery mombaarã ou xapy'a 'rã.
23 Pova'e ayvu voi 'arandu regua hi'arandu va'e kuery omombe'u va'ekue.
24 Heko vai va'e mboeko porãare re
25 Ha'e rã heko vai va'e mbopagaare re ma ima'endu'a porãa 'rã,
26 Jojuru rayvu va'e rami avi
27 Enhea'ã oka rupi mba'emo rejapo aguã,
28 Ndero katy'igua re ndeayvu rive eme mba'e py e'ỹ,
29 Aipo're eme: “Ha'e va'e xere ojapo vaiague rekovia hexe ju 'rã xee ajapo ha'ekue rami.
30 Xee aaxa avy inhate'ỹ va'e mba'ety rupi,
31 Ha'e vy aexa rã juuty anho itui,
32 Ha'e nunga aexa vy aikuaa porã pota
33 Xapy'a'i rekeve jave, xapy'a'i nderopeyi vy
34 ou xapy'a 'rã nemomboriauarã imonda va'e rami,