1 Jokorea rupi mba'emo opeja va'e gui Senhor ojeguaru,
2 Jajejou porã rei rive ramo avave rei nanhanemboeteai 'rã,
3 Heko porã va'e anhetẽ rupi ikuaia ma oguereko 'rã ha'evea rupi,
4 Nhombopagaa ára py opa mba'e jarekopa va'ekue ndovarei 'rã mba'everã,
5 Anhetẽ rupi ipy'a va'e pe ma heko porãa ae omoatyrõ 'rã haperã,
6 Heko porã va'e oo jepe 'rã ha'e kuery ae reko porãa py,
7 Heko vai va'e omano ramo mba'emo oarõague voi opa 'rã,
8 Heko porã va'e ogueraa jepea 'rã ojexavaia gui,
9 Anhetẽ rupi e'ỹ ikuai va'e ma ayvu py rive oity 'rã oirũ kuery,
10 Heko porã va'e ikuai porã ramo tetã pygua kuery ha'e javi 'rã ovy'a okuapy,
11 Heko porã va'e ogueroayvu porãa rupi tetã ha'e javi rupi 'rã ikuai porã,
12 Oirũ pe “Mba'e vare'ỹ” he'i va'e re ma noĩ 'arandua,
13 Joekokue ramigua rive omombe'u va'e onhea'ã 'rã onhomi mbyre oikuaa aguã,
14 Joguerekoa hi'arandu va'e ndoikoi ramo avakue pavẽ 'rã ho'apa,
15 Oirũ orevea opaga aguã rami oiko va'e ojexavai 'rã,
16 Kunha porayvu va'e ojou 'rã imboetearã,
17 Mborayvu rupi ikuai va'e ma ha'e kuery pe ae ojapo porã,
18 Heko vai va'e ojeupe guarã ojou va'e ma imarã va'erã,
19 Heko porã va'e oo 'rãe tekove katy,
20 Opy'a py opa marã ikuai va'e gui Senhor ojeguaru ete 'rã,
21 Heko vai va'e nombopagaa e'ỹi 'rã, jaikuaa,
22 Ouro guigua ma poryko xĩ jeguarã oĩ ramo nda'evei.
23 Heko porã va'e oipotaa rami vy oiko 'rã nhomoingo porãarã,
24 Joupe mba'emo ome'ẽ rive-rive'i va'e ojou retave 'rã heravy,
25 Imba'eme'ẽ porã kuaa va'e ma oiko porã 'rã,
26 Mba'emo aju nomboja'oxei va'e re ma heta va'e kuery ijayvu vai 'rã okuapy,
27 Joupe ojapo porãa rupi ikuai va'e omboetea 'rã,
28 Omba'e rei-rei re rive ojerovia va'e ho'a 'rã,
29 Ngopygua kuery ndoguereko kuaai va'e ojou 'rã yvytu rive,
30 Heko porã va'e ma yvyra'a tekove me'ẽa rami ikuai,
31 Yvy re heko porã va'e ikuai teria ja ombopagaa 'rã.