1 Ta'y kuery hi'arandu va'e ombovy'a 'rã nguu,
2 Mba'emo jajejavya rupi jajou va'e ma mba'everã ndovarei,
3 Senhor ndoejai 'rã heko porã va'e karuai oendu oikovy aguã,
4 Inhate'ỹa rupi omba'eapo va'e ndojoui 'rã mba'eve,
5 Kuaray aku porã jave ta'y hi'arandu va'e omono'õ 'rã mba'emo,
6 Heko porã va'e akã re oĩ 'rã imoingo porãarã,
7 Heko porã va'e re nhanema'endu'aa ma nhanemoingo porã 'rã,
8 Opy'a py hi'arandu va'e omoĩ porã 'rã ojapo uka pyre,
9 Anhetẽ rupi ikuai va'e oĩ atã 'rã,
10 Nhombotavya rupi oxapymi-pymi va'e ma nhomomboriau va'e vy,
11 Heko porã va'e ayvu ma tekove me'ẽa ae,
12 Mborayvu rupi e'ỹ ikuai va'e nhomopu'ãmba rei 'rã.
13 Oiko kuaa va'e ijayvu rã nhaendu vy jajou 'rã nhane'arandurã,
14 Hi'arandu va'e omoĩ porã 'rã 'arandua,
15 Oguerekopa va'e ma omba'e rei-rei re oĩ atã, tetã ikorapa va'e py rami,
16 Heko porã va'e oikoague repy ma tekove,
17 Ombo'ea ague rami ikuai va'e ma tape tekove katy oo va'e rupi oje'oi,
18 Ijapu va'e ma opy'a re omoĩ 'rã joe nda'ija'eia,
19 Ijayvu reta rei va'e ojejavy 'rãe,
20 Heko porã va'e ayvu ma prata oiporavo pyre rami,
21 Heko porã va'e ayvu ma teta omongaru va'e rami,
22 Senhor nhandereroayvu porã vy ojapo jajou-jouve aguã rami,
23 Hi'arandu e'ỹ va'e oikuaa ramo opa marã rei nhandekuaia rupi merami 'rã javy'a,
24 Heko vai va'e mba'emo gui okyjea va'e ae 'rã oiko hexe,
25 Yvytu vaikue opytu'u xapy'aa rami avi heko vai va'e kuery reko voi okanhy xapy'a 'rã,
26 Nhaneraĩ pe vinagre nda'evei, ha'e nhanderexa pe ma hataxĩ nda'evei,
27 Senhor renonde jajererokyjea rupi vy jaikove puku 'rã,
28 Heko porã va'e oarõa ma ombovy'a 'rã,
29 Senhor guigua tape ma anhetẽ rupi ikuai va'e onhemi aguã,
30 Heko porã va'e ma raka'eve rã peve ndoityai 'rã,
31 Heko porã va'e ayvu nhomo'aranduve 'rã,
32 Heko porã va'e ayvu nhombovy'a 'rã,