1 — Ejapukai aỹ! Ha'e rami teĩ oiko ri nda'u nerenduarã?
2 Mba'eta hi'arandu e'ỹ va'e ipoxya ae ombovaipa 'rã.
3 Xee ma aexa porã hi'arandu e'ỹ va'e onhemoingo porã merami ramo.
4 Ta'y kuery voi mombyry ikuai ipytyvoarã gui.
5 Ha'e kuery onhotỹ va'ekue ma ijajupa rã ikaruai va'e kuery ho'upa rive 'rã,
6 Mba'eta teko axy ma yvyku'i gui rive ndoikoi,
7 Ha'e rami 'rãgue py avakue ojexavai aguã rami ae 'rã itui'i,
8 — Ha'e gui xee va'e rire ma aeka 'rãgue Nhanderuete,
9 Mba'eta ha'e ma ojapo 'rã mba'emo tuvixa va'e oikuaa pyrã e'ỹ,
10 Ombo'oky 'rã yvy áry rupi,
11 Ha'e rami vy ogueraa jepe 'rã yvyĩgue'i peteĩ henda yvatea py,
12 Ha'e rã jokorea kuery onhembopy'aa ma ha'e ombovaipa 'rã,
13 Ombo'a 'rã oikuaapave va'e nhombotavya py ae.
14 Ha'e kuery ma ara py teĩ ojou 'rã pytũa anho,
15 Nhanderuete ma jogueraa jepe 'rã ha'e kuery juru gui kyxe oẽ va'e gui,
16 Ha'e rami rã oĩ 'rã iporiaukue'i oarõ okuapy aguã,
17 — Ovy'a ete 'rã avakue Nhanderuete omo'arandu va'e.
18 Mba'eta ha'e ma nhomboai 'rã, ha'e gui ha'e ae ju oipoano 'rã.
19 Seis-kue rejexavaia gui ha'e ndereraa jepe 'rã,
20 Karuai py teĩ ndereraa jepe 'rã remano aguã gui,
21 Nderepy 'rã ayvu vai gui,
22 Mba'emo mbovaipaa ha'e karuai oiko rã repuka 'rã,
23 Mba'eta yvy rupi ita ikuai va'e reve voi rejapo 'rã peteĩ rami ikuai porã aguã,
24 Reikuaa 'rã ndero py mby'a porã oĩa,
25 Reikuaa avi 'rã neramymino kuery heta 'rãa,
26 Ndetuja'i jave teĩ nembaraete reve 'rã reo yvyra rupa py,
27 — Ma'ẽ, ha'e nunga re roikuaa pota rã ha'e rami ae.