1 Jó pe Senhor aipoe'ive tema:
2 — Ha'e gui ijayvu poyi va'e nda'u nhombovake ta Ipo'akapa va'e reve?
3 Ha'e ramo Jó ombovai Senhor. Ha'e vy aipoe'i:
4 — Xevy pe ma nda'evei. Mba'exa tu rombovai ta?
5 Peteĩgue xeayvu rire teĩ nambovai kuaavei ma.
6 Ha'e ramo yvytu jere mbyte gui Senhor ombovai ju. Ha'e vy aipoe'ive Jó pe:
7 — Eiko katu ha'vy ava rami.
8 Ndee ta'vy remboyke rive 'rã xereko porãa?
9 Tyrã ndee teve Nderuete rami ndejyva mbaraete va'e?
10 — Ndejee emoĩ ha'vy ndeyvatea ha'e ndetuvixaa.
11 Xevy pe exa uka ndepoxya.
12 Exa pota onhemboyvate rei va'e ha'e javi re, ha'e emo'yvyĩ'imba.
13 Ejatypa imbokuapy yvy ku'i py.
14 Ha'e rami rã mae 'rã xeayvu
15 — Eikuaa pota aỹ hipopótamo ndereve amoingo avi va'ekue re.
16 Imbaraetea ma hye re oĩ,
17 Huguai ma yary rakã rami hatã va'e.
18 Ikãgue ma overa va'e aygue rami imbaraete va'e.
19 Ha'e va'e ma Nhanderuete remimoingo regua omboetevepy.
20 Anhetẽ, yvy'ã ikuai va'e áry rupi oĩ nhuũ ho'u va'erã,
21 Onheno 'rã yvoty ikuai va'e guy rupi,
22 Ha'e ramo yvoty ae omo'ã 'rã inony.
23 Yakã tyguaxu teĩ ndojapurai 'rã.
24 Ha'e rã oma'ẽ ho'amy ramo amongue nda'u ojopy kuaa 'rã?