1 — Ndee teve reikuaa kavara yvy'ãa rupigua ta'ya ára?
2 Reipapa kuaa teve mbovy jaxy peve pa ha'e kuery ipuru'aa?
3 Ha'e kuery ma ta'y'i aguã ojero'a 'rã,
4 Ta'y kuery ma imbaraetepa 'rã okuapy,
5 — Mava'e tu opoi 'rã mburika'i ka'aguy regua?
6 Ha'e va'e rekoarã ma tekoa e'ỹa ame'ẽ,
7 Ha'e kuery ojojai 'rã tetã revovo,
8 Yvy'ã ikuai va'e rupi ae okaruaty oĩ,
9 — Toro ka'aguy rupigua teve omba'eapoxe 'rã ndevy?
10 Remoxã kuaa 'rã teve yvy karaĩa re?
11 Hexe teve ndee rejerovia 'rã imbaraete vaipa va'e ramo?
12 Hexe rejerovia teve renhotỹ va'ekue nderopy ogueru aguã,
13 — Guyra-nhandu ma opepo ombota-mbota 'rã ovy'a reve.
14 Any, ngupi'a oeja 'rã ovy yvy py,
15 Mba'eta hexarai 'rã amongue opyrõ vy ombovopa va'erãa gui,
16 Nopena porãi 'rã gua'y kuery re, gua'y kuery e'ỹ re rami.
17 hi'arandurã Tuuete nome'ẽi rire,
18 Ha'e rami teĩ opo reve onha ovy aguã opu'ã ma vy
19 — Ha'e gui ndee teve kavaju pe reme'ẽ 'rã imbaraeterã,
20 Rejapo kuaa teve tuku rami opo ovy aguã rami?
21 Ojo'o 'rã heravy yvyugua ombaraetea ae oguerovy'aa rupi.
22 Ojojai 'rã nhomongyjea kuery onhemondyi e'ỹ re.
23 O'áry hu'y ryru ogueraa va'e omoparã 'rã heravy,
24 Ipoxy ha'e ivai reve omou'ũmba 'rã heravy tape,
25 Mimby guaxu omonhe'ẽa ramo “Tenonde katy!” he'i 'rã.
26 — Ndee ne'arandua rupi teve taguato oveve,
27 Ndeayvua rupi teve taguato guaxu oo 'rã yvate,
28 Ha'e va'e ma itaova yvate va'e re oĩ 'rã guaityrã ojapo aguã py,
29 Ha'e py oĩa gui oexa pota 'rã guembiarã.
30 Ha'e va'e rire ta'y kuery oipyte 'rã tuguy.