1 — Ha'e gui aỹ ma xegui kyrĩgueve xejojai okuapy,
2 Mba'eta ha'e kuery inhangaipa ramo
3 Jexavai ha'e karuai gui ha'e kuery ikangypa okuapy.
4 Jai rogue ha'e yvyra'i rogue rive oipo'o,
5 Avakue mbyte gui omoxẽa.
6 Yvy'ã peguy kuaray'ã reia rupi ikuai,
7 Onhendu okuapy jai rupi,
8 Inhakã porã e'ỹ va'e ra'y kuery ikuai,
9 — Ha'e rã aỹ ma ha'e kuery xembojaru rei okuapy,
10 Xegui ojeguaru vy ojepe'a 'rã mombyry'i,
11 Mba'eta Nhanderuete ombopyu xerapa xã xembojexavai vy.
12 Ha'e rami vy xeaxu e'ỹa re opu'ã okuapy xemoanha rei aguã,
13 Ombovaipa okuapy xee aa aguã va'e rupi,
14 Xere ou okuapy tetã kora oitypaague rupi oike va'e rami,
15 Xere ou xemongyjearã,
16 — Aỹ ma xepy'apy py anhenhandu xenhe'ẽ ivaipa maa rami.
17 Pyávy xekãgue hu'ũmba ha'e ovapa va'e ramigua aendu,
18 Mba'emo vai aendu va'e gui xeao voi ojepokapa rei 'rã,
19 Xeruete, ndee ae xemombo yapo py,
20 Ndevy ajapukai rã ndee naxembovai.
21 Porayvu e'ỹ va'e renhemoingo xevy.
22 Rejapo yvytu xereupi vy hi'áry xereraa aguã rami.
23 Ha'e gui xee aikuaa amano aguã katy xereraa,
24 — Ha'e rami avi yty áry ava omomboa imoinyague gui nokuave'ẽi 'rã teve,
25 Xee ndajae'oi va'ekue teve ojexavai va'e re,
26 Iporã va'e xee arõ teĩ xere ou mba'emo vai.
27 Xeryepy rupi omyĩ va'e ndopytu'ui,
28 Xeporiau aikovy kuaray ojope e'ỹa rupi.
29 Xee ma jagua-tuvy nhe'ẽ ryke'y,
30 Xepire hu'ũmba reve ho'apa xegui,
31 Ha'e nunga rupi ixã reta va'e ambopu 'rãgue py xeraxẽ ainy xepy'a vai vy,