1 Ha'e ramo Jó ombovai:
2 — Peẽ kuery anho ma nhi'ã avakue peiko,
3 Ha'e rami avi xee voi peẽ rami xe'arandu va'e.
4 Ha'e gui xee ma xeirũ kuery xejojai rei va'e aiko,
5 Iporiau e'ỹ va'e kuery oikuaa rã iporiaukue'i ojou vaipy ikuai.
6 Porayvu e'ỹ va'e kuery ikuaia py ovy'apa rei 'rã,
7 — Ha'e rami teĩ eporandu na aỹ mymba ikuai va'e pe.
8 Ha'e rami e'ỹ vy eporandu na yvy pe,
9 Mava'e nda'u ha'e va'e kuery regua ndoikuaai 'rã
10 Mba'eta opo py oguereko guemimoingo kuery ha'e javi,
11 Xeapyxa py nda'u naendu kuaa potai 'rã ayvu aendu va'e,
12 Tyrã pa tujakue'i re anho teve oĩ 'arandua?
13 — Any! Nhanderuete re ae oĩ 'arandua ha'e mbaraetea.
14 Mba'emo ha'e oity va'ekue ma nomopu'ãavei 'rã.
15 Yy ha'e ojoko ramo opa mba'e ipirupa 'rã.
16 Hexe anho oĩ mbaraetea ha'e 'arandua.
17 Oipe'a 'rã nhomongeta va'ety kuery nhomongetaague gui,
18 Ombovaipa 'rã huvixave kuery po'akaa,
19 Sacerdote kuery ma ha'e oipe'a 'rã sacerdote ikuaiague gui,
20 Ijayvu kuaa va'e kuery gui ha'e oipe'a 'rã ayvu,
21 Yvatekueve re omoĩ 'rã nomboeteavei aguã,
22 Pytũ reia gui oexa uka 'rã mba'emo ndoikuaai pyre,
23 Yvy regua kuery ha'e omboetave 'rã, ha'e gui omokanhymba ju 'rã.
24 Yvy regua yvatekueve gui oipe'a 'rã 'arandua,
25 Ha'e ramo pytũ reia rupi ha'e kuery opovyvy 'rã oje'oivy hendy va'e ndoguerekoi vy,