1 Tanga tahut tano Watong, kanong a bilai ie.
2 I tahut bia diet ing no Watong gate kul halangalanga leh diet, diet na tange huo.
3 ma diet mah ing ga lamus hulungan diet mekaia ta ira kaba pise,
4 Ari ta diet ga rara narako tano mamasina hanuo bia.
5 Diet ga taburungan ma diet ga maruk,
6 Io, diet ga suah taar tano Watong ma ira udiet tinirih,
7 Ga lamus diet tiga takodasiana ngaas
8 I bilai bia diet na tanga tahut tupas no Watong utano uno harmarsai nong pai la patpataam
9 kanong i la hamamo diet ing diet maruk,
10 Ari diet ga kis taar narako ra kankado nong i haruat ma no kankado na minaat,
11 kanong diet gate patnau tar ta ira nianga ta God
12 Io, ga hapanpador diet ma ra dadas na pinapalim ing ga manga ubal diet.
13 Io, diet ga suah taar tano Watong ma ira udiet tinirih,
14 Ga kap hasur diet tano kankado nong i haruat ma no kankado na minaat
15 I bilai bia diet na tanga tahut tupas no Watong utano uno harmarsai nong pai la patpataam
16 kanong i la parparok hasur ira matanangaas na baras
17 Ari diet ga hanuat ulba ta ira udiet magingin na patnau
18 Diet ga miliguruane ira nian bakut
19 Io, diet ga suah taar tano Watong ma ira udiet tinirih,
20 Ga tule se no uno nianga ma ga halangalanga diet sukun ira minaset.
21 I bilai bia diet na tanga tahut tupas no Watong utano uno harmarsai nong pai la patpataam
22 I bilai bia diet na tun hartabar wara tangtanga tahut tana,
23 Ari diet ga kawas ta ira sip ures na tingaan tes.
24 Diet ga nes ira pinapalim tano Watong,
25 kanong ga ianga ma ga hatut tiga baiangin
26 Ira pakananoh ga kap haut ira sip uram muk naliu ma ga se hasur diet ures napu saakit.
27 Diet ga talau ma diet ga puko hoing ira tunotuno diet mom.
28 Io, diet ga suah taar tano Watong ma ira udiet tinirih,
29 Ga hamarur no baiangin gaam pupuh matien.
30 Diet ga laro ing no tes ga malile,
31 I bilai bia diet na tanga tahut tupas no Watong utano uno harmarsai nong pai la patpataam
32 Io huo, i bilai bia diet na hatamat ie nalamin tano kis hulungai ta ira matanaiabar
33 Ga pukusane ira taah gaam hanuat tiga mamasina hanuo,
34 Ga pukusane ira pise na nian gaam hanuat hoing ira marakon na pise,
35 Ga pukusane no mamasina hanuo bia, gaam hung ma ira laman taah,
36 Ga lamus tar diet ing diet ga taburungan bia diet na lon kaia,
37 Diet ga rup no pise ma diet ga so ira adiet nian ma ira hinau na wain.
38 Ga haidane diet, gaam haleng saakit ira nati diet,
39 Io, namur um, no winawas ta ira nati diet ga hansur ma diet ga hanuat malahahin
40 Aie nong i la milmiliguruane ira lualua,
41 Iesen ga halon ira maris sukun ira udiet hinangul
42 Ira ut na takodas diet nes ma diet guama,
43 Sige nong i mintot, i bilai bia na kap usurane kaiken ra linge