1 Yaa Yawe Yɛnŋɛlɛ li shari katugu li yɛn jɛnnɛ,
2 Leele mbele Yawe Yɛnŋɛlɛ lì pe go shɔ paa ki wogo ki yuun,
3 poro mbele lì pe gbogolo ma yiri tara pyew ti ni,
4 Pèle la puŋgo na yanri na toro wa gbinri wi ni,
5 Fuŋgo naa wɔgɔ ki ni tìla pe yigi,
6 Ma pe ta wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
7 Làa pe yɛgɛ sin wa kozinnɛ li ni,
8 Ki daga leele paa Yawe Yɛnŋɛlɛ li shari paa li sɔnni li kagbaraga ki kala na,
9 Katugu wɔgɔ la pye mbele na, làa pe wɔgɔ ki kɔ,
10 Pèle la pye ma cɛn wa kunwɔ pi diwi wɔlɔ li ni,
11 katugu pàa yiri ma je Yɛnŋɛlɛ li sɛnyoro ti na,
12 Ko kala na làa tege wa pe na ma pe go sogo,
13 Ma pe ta wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
14 Làa pe yirige ma pe wɔ wa kunwɔ pi diwi wɔlɔ li ni,
15 Ki daga leele paa Yawe Yɛnŋɛlɛ li shari paa sɔnni li kagbaraga ki kala na,
16 Katugu lì tuguyɛnrɛ kɔɔrɔ ti kaari,
17 Tijinliwɛ fu fɛnnɛ pèle la pye na kapere piin,
18 Yaakara cɛnlɛ pyew ti la kìla kɔ pe na,
19 Ma pe ta wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
20 Naa làa kaa para, a li sɛnrɛ tì si pe sagala,
21 Ki daga leele paa Yawe Yɛnŋɛlɛ li shari paa sɔnni li kagbaraga ki kala na,
22 Pe daga mbe nayinmɛ saara wɔ Yɛnŋɛlɛ li yeri mbeli shari,
23 Pèle la pye na tangala piin wa kɔgɔje wi na, ma ye tɔnmɔkɔɔrɔ tugbɔɔrɔ ni,
24 Ki woolo pàa Yawe Yɛnŋɛlɛ li kapyegele ke yan,
25 Làa para, ma ti a tifɛliŋgbɔgɔ kà yiri na gbɔɔn,
26 Pe tɔnmɔkɔɔrɔ tugbɔɔrɔ tìla pye na yinrigi wa naayeri, na sɔngɔrɔ na tinri wa tɔnmɔ pi ni,
27 Yɛkanŋguwa la pye pe na, a paa tanri na gbali ndɛɛ sinwɔɔlɔ wɛlɛ;
28 Wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
29 Làa tifɛliŋgbɔgɔ ki yerege,
30 Naa laga kìla kaa yere ma pyeri dinw, a kì si yɔgɔrimɔ kan pe yeri,
31 Ki daga leele paa Yawe Yɛnŋɛlɛ li shari paa li sɔnni li kagbaraga ki kala na,
32 Ki daga paa li gbogo wa li gbogolomɔ woolo pe sɔgɔwɔ,
33 Yawe Yɛnŋɛlɛ lo li ma gbaanla pe waga mbe pe kanŋga gbinri,
34 Li ma tara nda tì tanla ti kanŋga mberi pye gbanŋga tara,
35 Li ma gbinri wi kanŋga fun mboo pye lambaaga,
36 Li ma ti fuŋgo yɛn mbele na pe ma cɛn wa,
37 Li ma ti pe ma kɛɛrɛ kɔn ma yariluguro lugu,
38 Li ma duwaw pe na, pe ma se ma lɛgɛ fɔ jɛŋgɛ,
39 Ɛɛn fɔ pele yɔn la pye na kologi na kee, fɔ a pe go kì sogo pe na,
40 Yɛnŋɛlɛ lì ti, a fanŋga fɛnnɛ pè tifagawa ta,
41 Li ma fyɔnwɔ fɔ wi shɔ mboo wɔ wa jɔlɔgɔ ki ni,
42 Lesinmbele pe ma ki kagala ke yan ma ke kɔrɔ jɛn, nɛɛ yɔgɔri,
43 Lere ŋa wi yɛn kajɛnŋɛ wila ki kagala ŋgele ke kɔrɔsi,