1 Kona, a Zhɔbu wì si ka taga wi lelɛɛlɛ sɛnyogo ki na naa, ma yo fɔ:
2 E, ndɛɛ ki pye mbe ja ya sɔngɔrɔ mbe pye paa wagati ŋa wì toro faa wi yɛn,
3 Wagati ŋa ni li fitanla wìla pye na yiin na go na,
4 E, ndɛɛ ki pye mbe ja ya pye paa yɛgɛ ŋga na mìla pye wa na lefɔnrɔ sanga wi ni;
5 Ki wagati wi ni, Yawa pi ni fuun fɔ wìla pye na ni,
6 Ki wagati wi ni, kìla pye ma tanla, a mila na tɔɔrɔ ti jogo wa nɔnɔ wi ni,
7 Kìla pye, na mi kaa kee wa lelɛɛlɛ pe gbogolosaga wa ca ki mbogo yeyɔngɔ ki na,
8 na lefɔnmbɔlɔ pe kanla yan mila paan, pe ma yiri wa, ma laga ki kan na yeri,
9 Ca ki fanŋga fɛnnɛ pe ma pe sɛnrɛ ti yerege,
10 Ca ki teele pe ma pe magaŋgala ke sogo,
11 Lere ŋa wìla pye na nuru na yeri, wo la pye na yuun fɔ fɛrɛwɛ yɛn na woo;
12 katugu kìla pye, mi ma fyɔnwɔ fɔ ŋa wìla pye na sagawa jaa wi shɔ,
13 Kìla pye, lere ŋa kaa jaa mbe ku wi ma duwaw pye na kan;
14 Mbe pye mbe sin kìla pye na yeri paa yaripɔrɔ yɛn na na,
15 Muwi mìla pye fyɔɔn wi yɛngɛlɛ wele, mbaa wi yɛgɛ sinni,
16 Muwi mìla pye fyɔnwɔ fɛnnɛ pe to we, na pe go sinni,
17 Ɛɛn fɔ kìla pye mi ma lembasinmbele pe tugbilala pe kaari pe na,
18 Ki wagati wi ni, mìla pye nala yɛɛ piin fɔ mi yaa ka ku yɛyinŋge na wa na go,
19 Mi yɛn paa tige yɛn, ŋga ki niŋge kì ye ma gbɔn wa tɔnmɔ pi na,
20 Kona mi yaa koro mbaa gbɔgɔwɔ fɔnmbɔ taa suyi,
21 Ki wagati wi ni, pàa pye na nuru na yeri, nala singi,
22 Na mi ka para mbe kɔ, lere nala sɛnrɛ ti kɛ;
23 Leele pàa pye nala singi, paa yɛgɛ ŋga na pàa pye na tisaga ki singi,
24 Na pe kɛɛ ka kɔn pe na sanga ŋa ni, mi maa tɛgɛ pe ni fuwɛɛ mbe nayinmɛ kan pe yeri,
25 Mìla pye na konɔ na pe yaa lɛ li nari pe na, mìla pye pe yɛgɛ sinvɔ;