1 Ee, kaselege yi, ki kagala mì ke ni fuun ke yan yɛnlɛ ni,
2 Ŋga yè jɛn, mi fun mìgi jɛn;
3 Ɛɛn fɔ mila jaa mbe para yawa pi ni fuun fɔ wo ni,
4 Yoro wo na, ye yɛn na finlɛlɛ na tɔnni kaselege ki na;
5 Ndɛɛ ki pye ye ja pyeri yee para,
6 Ye logo na yeri, mi yaa para mbanla yɛɛ shɔ,
7 Naga yɛn ma, ye mbe yɛnlɛ mbe sɛnrɛ mbasinnde yo Yɛnŋɛlɛ li mɛgɛ ni wi le?
8 Yaa ki jate mbe gbogolo Yɛnŋɛlɛ li ni wi le?
9 Na Yɛnŋɛlɛ li ka ye sɛgɛsɛgɛ mbe wele, ki mbe yɔn ye na?
10 Ki woro na lere kɔɔn shyɛn, pa li yaa ye jɛrɛgi,
11 Naga yɛn ma, li gbɔgɔwɔ pi se ka fyɛrɛ wa ye na wi le?
12 Ye lelɛɛlɛ sɛnyoro nda yè yo, ti yɛn kayɔngɔ fu paa cɔnrɔ yɛn;
13 Ye pyeri wa, yanla yaga mi yaa para!
14 Mì cɛn kala li ni fuun li cɛnwɛ,
15 Ki ka Yɛnŋɛlɛ li ndanla lilan gbo, jigi tagasaga ka yɛgɛ woro na yeri naa.
16 Na mi ka ko pye ma, ko mbe ya mbanla shɔ;
17 Ye logo na yeri, yanla sɛnrɛ ti logo jɛŋgɛ!
18 Ye wele, mì gbɛgɛlɛ mbege yɛgɛ naga fɔ mi yɛn kaselege ko na;
19 Ambɔ wila jaa mbe baga na na?
20 Ɛɛn fɔ, Yɛnŋɛlɛ, mila ma yɛnri, maga kagala shyɛn ŋgele ke pye na kan,
21 Ma kɛɛ ŋga kila na tege, ki laga na na,
22 Ko puŋgo na, ma para, pa mi yaa ma yɔn sogo,
23 Kambasinnde naa puŋguwɔ jori mi pye?
24 Yiŋgi na, a ma nɛɛ ma yɛɛ lara na na,
25 Naga yɛn ma, wɛwaga ŋga tifɛlɛgɛ kìgi lɛ na kee ki ni, ko ma mbe yɛnlɛ mbaa wiin ki ni wi le?
26 Ma yɛn na jɔlɔgɔ kaŋgbangala yɔnlɔgi na mɛgɛ ni;
27 Màla tɔɔrɔ ti le tugurɔn ŋgbɛɛrɛ na,
28 Ma si yala na yinwege ki yɛn na jogo