1 Bab-Jehová-nug an odummoged.
2 Mola-dummad-yoiyobi nega-ibegwaledi begi ebirnaid,
3 Diigine, be-nega-dummagan-urbega be imaked,
4 Burwamala, be-gayaburba-berbegedga be imaked,
5 Napanega, e-saila-birgi be sisad,
6 Napanegga e-mor-dummad-naiyobi, muu-billi egi be nasiksad.
7 Diimarse be uludedbali, diimala ilided.
8 Diimala, yalamar-birise engusad,
9 Dii melle bar napneg-odogega,
10 Bedi, ibe-diimar-ariogwichidi, dianganbali, oiirmakega be saed.
11 Ibdurgan-sapurbarmaladi, a-dii gobmalad.
12 A-dii-gakabali, sikwimala e-uu urbe damalad.
13 Be-nega-akale, yalamar be ogmaid.
14 Molimarga gagan-ara-aramalad-oniega be imaked,
15 Vino-weligwar-emar-saed-amiega,
16 Bab-Jehová e-sapimala-urbisadi, sapi-urwarmala Líbano-yargi urbisadi
17 A-sapimargine, nuumala e-uu sobbukwad,
18 Yala-dummaganbali, sibad-sapurbarmalad bukwad.
19 Bab-Jehováʼye, yolamar-nagumaid-magar-daklegega, bee be nii nasiksad.
20 Neg-mutik-imakegala, be negsichidi nasikdaed.
21 Achumigur-nono-wawaamalad e-masbina uurmakdidaed.
22 Dad-ibeler-nakwialile,
23 Geb dulemala, arbaega gwisguardamarmogad,
24 Bab-Jehová, ibiyobi be ibmarmar-imaksadi, ichesur mergue.
25 Agine muu-billi-dummadi naid, a-yagine ibmar-durgan-bukidar bukwad.
26 Muu-billigine, ulu-dummagan iirmakbukwad,
27 Bela we-ibmar-durgana begi gudidiid,
28 Ega be masgunned ukmaid, emardi be-abin gundidiid.
29 Be wagar-biriar-dakdele, be-abin gwayiddamalad.
30 Be-Burba be barmialile, bela gannarse napneg obinoleddaed.
31 Bab-Jehová-e-gangued-yeerdakleged degisadegusun.
32 Bab-Dummadi napneg-dakdele, ese napneg wawanmakdedaed.
33 An dula-gudiidgine, Bab-Jehováʼga an namakoed.
34 Ulubgi-an-egi-binsaedi, Bab-Dummad yeer-itogoed,
35 Dule-isgudimalad napneggi bergumarsun.