1 Binsaed-Nikagued, ¿anmarse iseedi gornaisursi?
2 Binsaed-Nikagued, igarba yar-birigwagi gorgwisdaed,
3 Neggwebur-doged-e-yawagakmar-dikarba ise-gollar gornaidaed.
4 “Machergan, bemarse an gornaid,
5 Bemar-ibmar-wissurmalad, itoakwaa be gudisamala.
6 Nue an-itomalo, an ibmar-nuegan sogesokalid.
7 An ibmar-sogedi gakangi sunmakosulid,
8 An-gayaburbamar, igar-innikigwadbi sunmaked,
9 An-gayaburbamar, dule-magar-neg-itogedgala baisursunna-noed.
10 Mani-abelegedba an-ibmar-odurdakedbina bur bule be sogmala.
11 Ar Binsaed-Nikagued, dimmurgiid-e-akwa-yeerdaklegedba bur bule ibnuedid.
12 “Ani an Binsaed-Nikaguedi, itoakwaa-binsaedbogwa an gudiid.
13 Dule, Bab-Jehová-dobekwaa nanadiile,
14 Binsaed-uklegeddi, angi maid,
15 Ani an Binsaed-Nikaguedi, an-sogedba reymar wis negsedimalad.
16 An-sogedba dule-nug-nikamalad negsedimalad,
17 Dule-an-sabmaladi, an sabmogad.
18 Ibmar-bukidar-nikuleged angi danikid,
19 An-binsaed-ukedi, olo-nuedba bur-nuedid.
20 Ani an Binsaed-Nikaguedi, igar-inniki-imaklegedba an nanaed,
21 Dule-an-sabesar-gudimalad an onasgudiid,
22 “Bab-Jehová ibmar-obinyed-iduale, bato anga burba-dulad uksad.
23 Yoo neg-nagued-iduale, Bab-Jehová an-obinnisad.
24 An gwalulesgua, demar-wilagan amba yoo nagued.
25 Yala-dummagan-nagued-idu, an gwalulesad,
26 Bab-Dummad amba yoo napneg-nasikgua,
27 Bab-Dummad mogir-arad-nasiknaigua, a-idu, bato an gudiid.
28 Bab-Dummad mogirmar-nasiknaigua, a-idu, bato an gudiid.
29 Bab-Dummad demar-mer-murega, demargala igar-abingunanaid-ilemaknaigua, a-idu, bato an gudiid.
30 Bab-Dummadbogwa bela igar-ilemaknai an gusad.
31 Bab-Dummad-napneg-obinnisadgi an wergudiid,
32 Ani an Binsaed-Nikaguedi sogbalid:
33 An-binsaed-uked be-nue-itomala,
34 Dulemar-nabir-an-itodimalad, bane-bane an-yawagak-naba an-edarbedimalad,
35 Ar dule an-aminonidibe, burba-dula-maid aminonikoed.
36 Dule an-obandibe, na dukin bonigan-amioed.