1 Machi, bega-an-ibmar-sogedba be dae,
2 Igargan-an-bega-ukedba be nanaele, be dula gudiguoed.
3 An-be-unaedi, olargan-googi-yoiyobi, be sedii sae,
4 Binsaed-nikaguedga be soge: “Be an-bunye.”
5 Adi, wemar, ome-sui-dikarba-yolediidgi, be-ollor-imakoed,
6 An-neggi, yawagak-bipigwad-imbaba an atakded.
7 An dakalid, sapingana-binsaedsurmalad-abargi, machi-wargwen bur-binsaed-sated gudii.
8 We-sapingwade, igar-abingunaidse warmakdapid,
9 Deunni, neg-sedomaid, neg nue-gutuleded,
10 Geb agine, ome e-abin-noalid. Ome gambanuchu-imakedyob mor-yoid.
11 We-ome neg-gagadidaed, gwinni-gwinni daed,
12 Galimbaba gudidaed, dulemar-bukidar-ambikuedgi gudidabalid.
13 We-ome, sapingwa-daksagua, gadebinne imaksad,
14 “Gwenatigwar-guega Bab-Dummadga an ibmar-ukoye an sogsad.
15 A-ulale, an be-abin noalid.
16 An-gabedgi atue-nued-yeerdakleged, lino-dubgi-sobaled-Egiptoʼgi-danikid an ogichad.
17 An-gabedgi ina-wawadikmalad, mirraʼye-nugad, áloeʼye-nugad, degine, canelaʼye-nugad an eosad.
18 Anba be dage. Anmar nog-gobmai oibodagoed.
19 Ar an-sui neggi gudisulid,
20 Mani-ichesuli sesa-naded,
21 Weyobi, ome, agumaksadgi,
22 Moli-alugwasualedi, e-oburgwilegedse ebipilemaiyobi, machigwa ome-sorba-nai nadapid.
23 Igi nuu burgwed-wissuli saki-naidse naddae,
24 Machi, emigi nue be an-itoge,
25 Melle a-omegi-binsadii be sae,
26 Ar a-omese bukidar machergan yardaklediid.
27 We-ome-negse be nadele, be burgoed.