1 Machi, melle an-igar-odurdaked be iego,
2 Ar deyob be imakele, we-napneggi suitii mai be guoed,
3 Sabgued-igar melle be iego,
4 Deyob be imakele, Bab-Dummad nabir be-dakoed,
5 Melle be-ibmar-wisidba be nanadii guo.
6 Bela be ibmar-imakedgi Bab-Jehováʼse idakdii be imako.
7 Mer be binsao, “An ibmar nue-wisye.”
8 Deyob be nanaele, we-igala, bela bega ina-nuedga guoed,
9 Be-ibmar-nikad-Bab-Jehováʼga-ukedgi Bab-Jehová-nug be odummoge.
10 Deyob be imakele, be-ibmar-gwag-saboged-uu ena sii guoed,
11 Machi, Bab-Jehová sabsur-be-odurdakalile, melle isdar be itogo,
12 Igi baba na e-mimmi-sabedba sabsur-odurdakdae,
13 Dule binsaed-nikagued nikunonikile, we-dulegi nued binsalegoed.
14 Binsaed-nikagued maniba bur bule ibnuedid,
15 Binsaed-nikagued, akwa-nuegan-manisailadba bur ibnuedid.
16 Ar binsaed-nikagued we-napneggi suitii mai be-imakoed.
17 A-igarmarba-nanalegedi, yeer-ito dule-saedid,
18 Dule binsaed-nikagued-amisale, egi burba-dula-gudigued nikued.
19 Bab-Jehová binsaed-nikaguedgi, napneg nasiksad.
20 Na ibmar nue-wisidba, diimar bachik-bachik nasiksad,
21 Machi, nue-binsakwaa be ibmar imako.
22 Deyob be imakele, burba-dula-gudii be-imakoed.
23 Geb agine, bonisuli be nanadii gudoed,
24 Be megid-sogele, be dobguosulid.
25 Ukiagwar-bonigan-noardaedi, be dobguosulid,
26 Ar Bab-Jehová beba gudiguoed,
27 Dule-baidga-ibmar-nued-imaked begi siile, ega be imako,
28 Melle ega be sogo: “Be nagwerye, banedse an be-bendakoye.”
29 Melle be-ai-begi-bensuli-gudiidgi be aibino.
30 Melle dule-gwen-be-oakalossulidbo be urwo,
31 Melle dule-sabsurdamalad-e-ibmar-imakdiidgi be nobguo,
32 Ar Bab-Jehová dule-isganamar nue isdar-dakdaed.
33 Bab-Jehová, dule-nued-daed-e-neguyagi nued binsadaed,
34 Bab-Jehová, dule-emargi-dododimaladgi dododamogad,
35 Dule-binsaed-ibegan-nug odummolegergebed.