1 Machi, an ibmar-bega-soged be itogele,
2 binsaed-nikaguedba be ibsaele,
3 Machi, nue-ibmar-wisigued be egisele,
4 binsaed-nikagued maniyob be e-bina-sogdiile,
5 geb be Bab-Jehováʼba-ibsaleged magar be itononikoed,
6 Ar Bab-Jehováʼbi binsaed-nikagued uked,
7 Bab-Jehová dule-ibmar-innikii-imakmaladga binsaed-nikagued uked.
8 Bab-Jehová dule-igar-maidba-ibmar-imakmalad nue-dakdidaed,
9 Geb agine, igar-inniki-mamaidba-imakleged,
10 Binsaed-nikagued be-ulubgi nagunonikile,
11 Itoakwaadaedi be-bendakoed,
12 Binsaed-nikagued, igar-isganaba-nanaega be-imakosulid,
13 Dulemar-igar-isganaba-bur-nanaega, igar-nuedgi-banguddamaladgi,
14 Dulemar-ibmar-isgana-saedgi-wergumaladgi, ibmar-isgana-imakedba iba-onodamaladgi,
15 Dulemar-igar-noar-noar-gudidamaladgi, igarmar-innikisulidba-gudidamaladgi,
16 Machi, binsaed-nikaguedi, dule-baid-e-omegi be-ollor-imakoed.
17 A-ome, Bab-Dummad-asabin na abirgunagwar-gued-igar-mesisad ieded,
18 A-ome-negse naye be sogele,
19 Dule a-omese-gochale, bar gannarse guosulid,
20 Machi, deyobi, dule-nued-nanadimalad-igarba be nanaoed,
21 Ar dule-igar-maidba-ibmar-imakmaladi we-napneggi gudii gumaloed.
22 Dule-isganamardi we-napneggi bergumaloed,