1 David-machi-Salomón Israel-e-rey, we-binsaed-nuegan narmaksad:
2 Adi, binsaed-nikaa guega,
3 igar-mamaid-wisguega,
4 Dule-nue-ibmar-wissulid ibmar-dukuar-maid-wisi imakega,
5 Dule-binsaed-ibedi, dule-nue-ibmar-wisidi, we-binsaed-nued itodaed,
6 Adi, binsaed-nuegan magar-itogega,
7 Binsaed-nikaguedi, Bab-Jehová-dobee-nanaedgi danikid.
8 Machi, be-bab-be-unaed nue be itogo.
9 Be-ibmar-durdaksad bega orgurginyobi ibnuedga guoed,
10 Machi, dule-isganamar be-yardakbi-gualile,
11 Bega sokarmalale: “Anmarba be dage.
12 Igi napa dule-burgwaled-doe,
13 Anmar ibmar-nuegan ichesuli sumaloed.
14 Anmarba be akae.
15 Machi, melle amarba be akao,
16 Ar we-dule-isganamar, ibmar-isgana bur gwae imakbidamalad,
17 Ar sikwimar e-wagab e-gaedsinai daksale,
18 Ar we-dule-isganamardi, na dukin yardakledimalad,
19 Dulemar-dogdar-maniginbi-binsamalad, deyob gunonidamalad.
20 Binsaed-Nikaguedi, binnasuli galimbaba goled,
21 Binsaed-Nikaguedi, dulemar-igar-itoged-abargi sunmaked,
22 “Sapingan, bemar-amba-nue-ibmar-wissurmalad,
23 ¡An-ibmar-sabsur-soged be itomala!
24 An bese gochamar-inigwele, yapa be an-itogusmalad.
25 Binsaed-nuegan-an-bega-uknaigusmaladi, aka be obachamalad.
26 A-ulale, bemar sabsur-odurdaklealile, an bemarga binnasuli alloed.
27 Burwa-dummad-goledyob bemargi dobed nagunonikile, an bemarga alloed.
28 ”A-ibagine, geb be anse gordamaloed.
29 Ar bemar binsaed-nikagued abessurmalad,
30 An-bemarga-binsaed-nued-uked be itossurmalad,
31 Na be-daed begi gannar aibinoed,
32 Be-isgusadba, be-ibmar-wissulidba, na be dukin berguoed.
33 Ar dule anba-ibsaerdi, bogidik gudii guoed.