1 An-sunnagwad, Bab-Jehová-uludedbali sabsur-dule-odurdaked an itosad.
2 Negsichiganaba an-nimai gusad,
3 Bali-bali, wachi-iliba, sabsur-an-odurdaknai gusad.
4 Bab-Jehová, an-san, degi, an-uka-dunnumakega imaksad,
5 Bab-Jehová angi bonigan ebiris nasiksad,
6 Dulemar-undargus-burgwismaladyob,
7 Bab-Jehová negyaba-mellesii an-imaksad,
8 An-bendakegala, an binnasuli gornai-inigwele,
9 An-iduar, an-igargi akwamar misad,
10 Bab-Jehová, wiob mas-gaega matarmakdiidyobi anbina gudiid,
11 An-san-oichimakega igargi an-obachad,
12 Guagwar warsi-gasad,
13 E-saboged-yaba sigumar-onosadgi gwagegi an-maksad.
14 Bela an-dulemarga an dodoedga gunonikid,
15 Bab-Jehová nunmaked-dummad anga uksad,
16 Bab-Jehová napagi an-omukusad,
17 Gwage-bogidikid an-ibe obelosad,
18 A-ulale, an soged: “An-gargangued bergusad,
19 An-wile-itodiid, an-neg-sate-gaamakdiid, be ebinsao.
20 Bane-bane an we-ibmargi binsadiid,
21 Degi-inigwele, an ibmar-soggwendi ebinsaed,
22 Bab-Jehová-sabgued-dummad-nikad-ular, anmar bergussulid,
23 Bab-Jehová-e-wile-emar-daked bane-bane binoleged.
24 Degisoggu, an soged:
25 Bab-Jehová, dule-egi-bensur-gudimaladgi nued daed,
26 Bur-nuedid, anmar doga-doga-itosulidgi, Bab-Jehová-anmar-bendakdagoed edarbed.
27 Bur-nuedid, dule sapingwagwad-akale, bonigan-abalagi ganna-gudigued durdaked.
28 Melle ese be gole, itoba bogidik sigoed,
29 Nue-bingegusa, wagar napase dulluu imakoed,
30 Dule-e-ibe-wagar-bibyonaidga, baid-wagar oyobalo,
31 Bab-Jehová anmar-obachad, degi-inigwele, deyob-anmar-imakmai sadeguosulid.
32 Nunmak-itoge anmar-imaked, degi-inigwele, anmar-wile dakbalid,
33 Bab-Jehová anmar-naibi imaked, anmar-wile-ito imaked,
34 Bab-Jehová weyob-ibmar-imaklemalad abemaisulid:
35 Bab-Dummad-Bur-Birigined-asabin dulega-igar-nabolesulid, abemaisulid.
36 Bab-Dummad-Bur-Birigined-asabin dulega-innikigwadba-igar-itolesulid, abemaisulid.
37 ¿Doa Bab-Dummad-ega-igar-uksuli ibmar-soged nabir imakoe?
38 ¿Ar Bab-Dummad-Bur-Birigined-igar-ukedbali ibmar-nuegan, degi, ibmar-isgana gusursi?
39 ¿Ar ibiga dule na e-isgusadba sabsur-odurdaklealir
40 Anmar na anmar-daedgi nue-binsasii imakmala,
41 Anmar, Bab-Dummad-nibneggi-maidse-golega argan onakwe.
42 Anmar isgusad, anmar uayasuli nanadii gusad,
43 Bab-Jehová, be nue-urwedbali be anmar-baleginned,
44 Anmar-bese-goled mer be itogegala, be mogir-imbaba dukusad.
45 Dulemar-yar-baid-baid-bukwamalad-abargine, ibmar-isganayob be anmar-barmeted.
46 Bela-anmar-isdarmalad sunmakdemalale,
47 Anmar, dobgued-dummad itosmalad.
48 An-neggwebur-e-saila-gusiid-nue-ibitosadbali,
49 An-ibyanis gwen bogigusuli aryomaid,
50 Bab-Jehová nibneggi-maid-akale, geb anmar-dakedse an gadi-gadi itononikoed.
51 An-neggweburgi-omegan-gudidiid sabsur-odurdaklenaid-ulale, bela-bela an-gwage an nunmak itoged.
52 An ibmar-akar-imaksasuli an-isdarmalad binsa an-baleginnanaid,
53 Dula napa-urba an-odosmalad,
54 Bela diiba an-nono-dogdegua,
55 Bab-Jehová, an dia-dummadgi gulluyaa mellesigua,
56 An-bese-wilesagwa-gornaid be itosad,
57 An bese gochad, be anse nonikid,
58 Bab-Jehová, bee be anbali nagusad,
59 Bab-Jehová, nue-an-wiosmalad be daksad,
60 Buged-mai angi-imakbimalad be daksad,
61 Bab-Jehová, dule-angi-urwe-nanaid be itosad,
62 Bab-Jehová, an-isdarmalad angi-sunmaknanai-osedoddaed be wisid,
63 Bab-Jehová, be dake, na ibu imaknanadibe, angi dodonanadamalad,
64 Bab-Jehová, wemar na bela e-ibmar-isgana-imaksad-ulale,
65 Ibmar-aku-itogega be imake,
66 Bab-Jehová, be-sae-itogedbali be wemar baleginne,