1 Eliú sunmakdebalid, weyob sogded:
2 “Ar an Bab-Dummadgi amba an nued bega ibmar-soged-nikasoggu,
3 An-bela-bela-nue-ibmar-wisid an bega oyogwelo.
4 Inniki an bega soged, bega an gakansaosulid,
5 ”Bab-Dummad dule-gandikidid, dule-ibmar-oakalodisulid obandisulid.
6 Bab-Dummad dule-isgana gudiguega imaksulid.
7 Bab-Dummad dule-nuegan nue-akwed,
8 Ar we-dulemar esgaryagi-sigega galenonikirdi,
9 Bab-Dummad we-dulemarga e-isgusad ega oyonaido,
10 Degidbali na magar itomaloed, wede Bab-Dummad ega sunmaknai,
11 Ar we-dulemar Bab-Dummadba ibsaele, Bab-Dummadga arbadele, e-burgwedse nasgumai gumaloed,
12 Ar Bab-Dummadba ibsasurmalardi, wisguosuli ukiagwar es-suidgi burgwenonimaloed,
13 ”Dule-isganamar na sae-itodamalad.
14 Bab-dummaganse-goled-neggi-dule-gambasamalad-burgweyobi,
15 Bab-Dummad dule-wiledimalad e-wilediidgi bendaked.
16 ”Job, ar Bab-Dummad bonigangi be-bendakoed,
17 Emide, dule-isganamar-wilubdaklegedyob be gunaisunnad,
18 ¡Degisoggu, nue salak!
19 Be mani-ibedguedgi be bendaklegosulid,
20 Neg-mutikid be edarbedii gudager, mer abdako.
21 Nue salakar. Mer be gannar ibmar-isgana-imakedgi binsao.
22 ”Bab-Dummad na e-ganguedba gannarba maid.
23 ¿Doa Bab-Dummadga sogoe, ibiga be deyob ibmar imaknaiye?
24 Bab-Dummad-ibmar-imaked be gatik-ogannogo,
25 Bela dulemar Bab-Dummad-ibmar-imaksadi dakmalad.
26 Bab-Dummad dule-dummad-maisoggu, degidbali, gege anmar e-daed baramied,
27 ”Bab-Dummad anmarga dii barmimaid,
28 Mogirmar-dii-owiega imaked,
29 ¿Doa wisguoe, ibiga mogirmar nanae?
30 Bab-Dummadi, demargine mar-gaedi barmied,
31 Bab-Dummad bela dulemar-yar-baid-baidgi-bukwamalad semaid,
32 Bab-Dummad mar-dakarmakmaid e-argangi gaed,
33 Mar-goled Bab-Dummad-maid oyoged,