1 Eliú sogdebalid:
2 Be nue itomala, Bab-Dummad-e-sunmaked mar-gollomakeyob-sunmaked be itomala,
3 Bab-Dummad e-mala-ibyedi, bela nibneg-gaed,
4 Bab-Dummad-e-sunmakedi, binnasur-itoleged,
5 Bab-Dummad binnasuli-sunmakdele, ibmar-gegerdakleged oyoardaed.
6 Bab-Dummadi, boo-batedga igar-ukdaed,
7 Bab-Dummad deyob ibmar-imakedbali, dulemar bar aineba ainidasurmalad,
8 Ibmar-durgan na dukuegala, e-dukued-yaba na bukusdamalad,
9 Dad-nakwed-argan-nuedsik burwa-goledba, burwa-oored danidaed.
10 Bab-Dummad-bunnogedbali, dii gwamakleddaed.
11 Bab-Dummadi dii-wiedi mogirmargi urbed,
12 We-mogirmar napneg-naid ebirbukwad.
13 Bab-Dummad na e-sogedba dii owied,
14 ”Job, nue be itogo,
15 ¿Be wisi, igi Bab-Dummad mogirmar see?
16 Degite, be soged, bela an ibmar wisye.
17 Emide, dad-nakwed-argan-nuedsik burwa-ued-danikidbali,
18 Bab-Dummad nibneg-egasadgi, esgoro-gordikidiyob daarmakar-nasiksadgi,
19 ”Anmarga be soge, igi anmar Bab-Dummad-abin-saoe.
20 Ar Bab-Dummadi an-ibmar-sogedi, ¿dule-baid-ega-soged abege? Suli.
21 ”Mogir dad-irwa-naid dadgi banguddibe,
22 Emide, dad-nakwed-argan-sapiledsiki neg dakarmakdanikid.
23 Anmar gege Bab-Dummad-Bela-Gangued-Nikadyob gued.
24 Bab-Dummad, dule-na-ibmar-wisirbaye-sogdiidi, gwen ibmar-wisi daksulid.