1 Job sogdebalid:
2 Esgoromala, napa-yaba onolesiid,
3 Dule-akwa-nuegan-amimaladi, bar negsichid-nai daksurmalad.
4 Neg-uluba-nanaledisulidgi yaamar akwimalad.
5 Yaa-matusulidgine arbananaidamalad,
6 A-yabali, akwa-dummagangine akwa-nued-zafiroʼye-nugad onomalad,
7 Sulubmar we-yaa-gwisaled dakdisurmalad,
8 Ibdula-ursirmaladbela, a-yaa-gwislegaledyaba dogdisulid.
9 Dule-akwa-nuegan-amimaladi akwa-nuegan-amiegale, akwa-dutusulid sarsonagusdamalad,
10 Akwa-dummagan-akwimalad a-yaba dii-oiirmakega yaa-dummagan omesdamalad.
11 Akwa-nuegan-amiegala, diwar-e-sailase warmakdamalad.
12 ”Degite, ¿bia binsaed-nued-nikagued danisunna?
13 Binsaed-nued-gargeguedi dule wissulid.
14 Muu-billi-maidbela soged:
15 Or-nuegangine, binsaed-nuegana amilesulid,
16 We-napneggi amba or-Ofir-bukwadgi binsaed-nuegan gege bakleged.
17 Binsaed-nuedi, bur or-nueganba, akwa-diamanteʼye-nugadba bur gargerbasailad.
18 Binsaed-nuedi, akwa-bisgi-nueganba ibnuedid,
19 Akwa-nued-topacioʼye-nugad Etiopíaʼgi-nikadi, gege binsaed-nued-nikagued-ebo yobi gued.
20 ”Degite, ¿bia binsaed-nued-nikaguedde danisunna?
21 Binsaed-nued-nikagued bela emargi dukumaid,
22 Bergulegedi, degi, burgwedi, weyob soged:
23 ”Unnila Bab-Dummadbi binsaed-nikagued-igar wisid.
24 Bab-Dummadi, we-napneggi galu-sukunmar-bubukwadse-bakale, wisid.
25 Bab-Dummadi, burwaga e-gangued mesnaigua, degine, muu-billiga e-dungued mesnaibargua,
26 Bab-Dummad, dii-wiedga igar mesnaibargua,
27 binsaed-nued-nikaguedi daksagusbalid.
28 Bab-Dummad dulemarga sogded: ‘An-dobekwaa-nanaedi, binsaed-nued-nikaadaedye.