1 Amola wali, Yoube! Na sia: huluane noga:le nabima!
2 Na da na asigi dawa:suga liligi huluane sia:musa: momagele esala.
3 Na sia: huluane da moloidafa amola na da dafawane sia: fawane sia:mu.
4 Gode Ea A:silibu da na da:i hahamoi amola nama esalusu i.
5 Di da nama bu adole imunu defele galea, nama adole ima.
6 Ani galu da Gode Ea siga ba:ma:ne defele esala.
7 Amaiba:le, di da nama beda:mu bai da hame gala.
8 Na da nabi, di da amane sia:i,
9 ‘Na da hame giadofai.
10 Be Gode da udigili nama doagala:musa:, logo hogosa.
11 E da na emo sia:inega la:gisa.
12 Be Yoube! Na da dima sia:sa! Di da giadofai dagoi.
13 Dia abuliba:le Gode da ninia egane sia:be amoma hame adole iaha,
14 Gode da gebewane sia:nana, sia:nana, be dunu afae da Ea sia: hame naba.
15 Gasia, dunu ilia da golasea,
16 Ilia da Ea sia: nabimusa:, E da ilima logesa.
17 Gode da ilia wadela:le hamosu logo hedofamusa: sia:sa.
18 E da ili gugunufinisima:ne logo hame doasimu.
19 Gode da dunu moloma:ne, olo amola da:iba:le se iasu ema iasisa.
20 Olo madelai dunu, ea da magedasu hou fisisa.
21 Ea da:i da udigili geloga:le, gasa dabuawane ba:sa.
22 Ea da bogoi sogega masunu gadenei ba:sa.
23 Gode Ea a:igele dunu osea:idafa da e moloiwane hamoma:ne olelesa.
24 A:igele dunu da ema asigiba:le, amane sia:mu. ‘E masa:ne yolesima!
25 Ea da:i hodo da bu gaheabolowane gasa fimu.
26 Ea da Godema sia:ne gadosea, E da ea sia: nabimu.
27 Dunu afae afae, ea da odagiaba amane sisane fofada:mu,
28 E da na bogoi sogega sa:imu logo amo hedofaiba:le, na da esalebe wea.’
29 Gode da amo hou huluane gebewane hamonana.
30 E dunu ea esalusu amo gaga:le, amola amo dunu hahawane esaloma:ne hamosa.
31 Wali, Yoube! Na sia:be goe nabima!
32 Be di da sia: galea, na naba:!
33 Be amai hame galea, ouiya:ma! Amola na sia: nabima!