1 “Okohtako, Jo! Otarame oezuhnõko imepỹ mana.
2 Otyme kure imehnõ zehno oexiry?
3 Tuaro pyra exikety enease ekurãkãko samo, otyro ahtary samo.
4 Imũkuru tõ osewomasaromepyra mã toto;
5 Omise exiketõ mokyro narykahpyry enahnõko mã toto,
6 Tupito nonory poe etuarimatoh exipyra mana,
7 Kypokoino xine popyra ehtoh oehnõko kyya xine mana.
8 “Jo, omorome jahtao eramary ropa Ritonõpo a popyra jehtoh ekarotohme eya.
9 Inyriry tõ osenuruhkatoh enetupuhsaromepyra sytatose.
10 Konopo enehpõko Ritonõpo mana nono pona,
11 Osenetaonohpyra exiketõ anỹnõko mana tuisamehxo toto ehtohme.
12 Tuaro exiketõ osenetupuhtoh enahkapõko Ritonõpo mana.
13 Zuarohxo exiketõ tapoisẽme exĩko zuaro
14 Tãxiahtao tykohmãse eya xine mana,
15 Tymõkomokãkara pynanohnõko Ritonõpo mana orihpyra toto ehtohme;
16 Naeroro kure ehtoh eraximatoh ekarõko Ritonõpo mana jamihme pyra exiketomo a.
17 “Tãkye mokyro mana, tukurãkase exikety Ritonõpo a!
18 Apurõko Ritonõpo mana,
19 Tuhke ẽmepyry ae opynanohnõko Ritonõpo mana popyra ehtoh wino,
20 Omise ehtoh konõto toehse ahtao opynanohnõko mana oorikyryino,
21 Oewomãko mana omi xihpyry a oryhmaryino,
22 Etonatoh toehse ahtao exianãko mase,
23 Otupi tõ po topu tõ ãkorekehkara exĩko mana,
24 Atapyĩ tao torẽtyke pyra exĩko mase,
25 Emũkuãko mase tuhke,
26 Tamuhpõme orihnõko mase, jamihme ro,
27 Etako pahne, Jo, morohne enease zae ehtoh waro jehtohme.