1 Mame tozuhse Jo a. Ynara tykase:
2 “Jetuarimary kuhpory se ase sam kary roropa ikuhtoh po.
3 Isawã motye omoxihxo exiry tuna konõto ehpio po.
4 Ritonõpo Jamihmehxo Exikety pyre ke tuose ywy,
5 Tuesapare jumẽtu exĩko mana onahpoty nae ahtao.
6 Yrome sautu pyra ahtao tomepore pyra tõsẽ exĩko mana.
7 Morohne enapyry se pyra ase ipunaka,
8 “Oty katohme ise jehtoh onekaropyra Ritonõpo nae ya?
9 Jetapary se ase eya,
10 Moro riry eya waro jahtao, pyhseky ykary tãkye jehtoh ke jetuhxo toehse jahtao ro.
11 Tapotũkehse ywy,
12 Topu risẽ sã jamihme hano?
13 Atakorehmasaromepyra ase,
14 “Popyra ehtoh toehse ahtao ahno a typynanopyry sehxo mana tope tomo a,
15 Yrome tonekunohse ywy oya xine,
16 Osemazuhme pehme mana jerumã ke, newe maro.
17 Yrome imeĩpo tuname exĩko,
18 Ahno tõ ytoketõ tahnõko mã toto tuna zupiry poko repe,
19 Mokaro oehketomo Tema poe, Sapa poe roropa,
20 Yrome pore, toeporehkase toto ahtao
21 Moro iporiry tonorẽ sã matose;
22 Omõkomory onekaropopyra exiase oya xine.
23 ‘Kypynanohko jepetõkara winoino,’ te,
24 “Kuamorepatoko,
25 Ajohpe pyra exikety zae ehtoh ekarõko mana.
26 Jotururu hxirory se hmatou?
27 Zae pyra matose:
28 Kuenetoko jenuru aka, ajohpe jekarotohme;
29 Epo hnae õtururukomo.
30 Okurohtao xine, ajohpe jekarõko matou?