1 Mame ynara tykase Ritonõpo Jo a:
2 “Jo, ymaro oseosezukuru se mexiase azahkuru jehtoh kurãkatohme.
3 Mame Ritonõpo tozuhse Jo a. Ynara tykase ynororo:
4 “Otara ãko ywy?
5 Tymotyẽkase ywy jotururu sero poko.
6 Morarame tyryrykane konõto htae Ritonõpo tõturuse Jo a. Ynara tykase ynororo:
7 “Owõko ty xikihme seromaroro ynekaropory ezuhtohme oya.
8 Jyhxirory se hma zae pyra jexiry poko, iirypyryme jehtoh poko, zae rokẽ õsekarotohme?
9 Ajamitunuru ekarõko mah yjamitunuru samo?
10 Morohne riry waro awahtao tuisamehxo oexiry enepoko,
11 Epyrypaketõ eneko;
12 Ajohpe pyra, epyrypaketõ eneko toto poremãkatohme, popyra exiketõ enahkatohme esarykõ po.
13 Zonẽko toto nono aka.
14 Morohne riryhtao oya ywy roropa oeahmãko ase:
15 “Onokyro Peemote eneko.
16 Morararo ijamitunuru eneko, jaxiry pũ jamihme mã kehko, zuakuru pũ roropa!
17 Arokyry tanỹse ahtao tũpore mana, wewe amoriry samo, jaxiry tõ pũ roropa jamihme mã kehko.
18 Mokyro zehpyry tũporemã kehko metau samo, jaxiry kurimene sã roropa.
19 Mokyro eneryhtao oya osenuruhkãko mase, ynyrihpyryme mã mokyro, jamihme roropa emero motye!
20 Onahpoty inapyry ahtãko mana ypy tõ po,
21 Ataxikãko mana omoxino zopikoxi,
22 Omoxino tõ sã zerukumãnõko mã kehko, saukeiru tõ roropa.
23 Enaromyra mana tuna kumaryhtao;
24 Onenukehkasaromepyra matose apoitohme;