1 “Onokyroimo Rewiatã apoiry waro mahno oka ke?
2 Eutary aka eunary ae eary riry waro hma,
3 Emyhpokapõko ropa nae oya?
4 Tõmiry etapõko nae oya toerohtohme opoetoryme, toorikyry ponãmero?
5 Imaro osemeikãko mano torõ pitiko maro osemeikary samo?
6 Mokyro ekamõko mah kana anỹnanomo a?
7 Warata tõ emary waro mahno ipihpyry wotohme?
8 Ikuhko oemary ke mokyro apory, itemuhmako toiro, moro onyrizomopyra mase,
9 “Mokyro ihpory Rewiatã eneryhtao rokẽ oserehnõko ahno mana,
10 Ihtomaryhtao zehno exĩko mana.
11 Onoky imaro osetapãko nae, osesekapopyra roropa?
12 “Seromaroro oturuxi oya onokyroimo Rewiatã axiry tõ poko, zumo aexiry poko te, jamihme aexiry poko, enara.
13 Ipihpyry onousaromepyra ahno mana; ipũ eworine.
14 Onoky mokyro mytary mytakapõko nae, mokyro zery taere exikety?
15 Ĩpary tupuhtuke tũpore topu samo tyõtose aosewomatohme, tuhke osepokona, zakare puhturu samo.
16 Morararo osepokona tõsexihse mã kehko kure samo, tyryrykane omõpyra ehtohme zaka, enara.
17 Tõsexihse mã kehko osepokona;
18 Mokyro ihpory Rewiatã ahtiuh karyhtao ikarany pisarara sã osenẽko mana,
19 Ĩtary ae apoto tũtãko mana ikarany pisarara samo roropa.
20 Eunary ae orexĩto tũtãko mana, oripo zopino amoriry tõ zatyry samo.
21 Mokyro puu karyhtao apoto zukãko mana,
22 Ipymyry ao ijamitunuru mana,
23 Ipihpyry jamihme, tũpore roropa kurimene samo.
24 Ipuropuru topu samo, imehnõ zuno pyra;
25 Towõse ynororo ahtao jamihme exiketõ oserehnõko mana;
26 Tapema mokyro anakohpyra mana.
27 Eya kurimene jamihme pyra mana, tiriiku zoko samo, metau eya wewe motasẽ samo.
28 Pyrou tõ mokyro onerehpyra mana.
29 Etaetaparyhtao kaparu ke tiriiku zoko ke etapatoh sã rokẽ mana eya.
30 Zuakuru mã toxiõtose ipuhturu tõ ke, oripo ehmosẽ sã, suisuime mã kehko.
31 Tuna zueme exikety kurokuro kamexipõko mana oripo ao samo, oriu samo kurokuro karyhtao oripo konõto ao.
32 Aytoryhtao tuna kuao, esemary saerehkaneme sã exĩko mana,
33 Onoky sã nã ynororo?
34 Imehnõ enẽko mã mokyro emero popyra exiketõ samo.