1 Mame tõturuse ropa Eriu. Ynara tykase:
2 “Jo, penekehpyra exiko, ajohpame samo.
3 Tuaro jehtoh pitiko rokẽ pyra mana.
4 Ynekarory emero ajohpe pyra mana;
5 “Jamihmehxo Ritonõpo mana!
6 Okynahxo isene ro iirypyrymãkõ onyripopyra mana,
7 Zae ehtoh poko exiketõ ewomãko Ritonõpo mana,
8 Yrome ãpuruhpyry taka tõmase ahno ahtao,
9 moro toehse ahtao mokaro enetupuhpõko Ritonõpo mana,
10 Otatõme ahno ripõko Ritonõpo mana, enaroximatoh ekaroryhtao eya xine,
11 Ritonõpo omipona toto ahtao, eahmaryhtao roropa eya xine, ewomanekõ nae exĩko mã toto,
12 Yrome aomiry omipona pyra toto ahtao, orihnõko rokẽ mã toto tuaro pyra exiketõ samo,
13 “Ritonõpo waro pyra exiketõ mã zehno exikehpyra tukurohtao xine, tuãnohse toto ahtao ro, takorehmanekõ onykohmara mã toto.
14 Zae pyra mã toto,
15 Yrome etuarimatoh ke ahno amorepãko Ritonõpo mana.
16 “Jo, typynanohse mexiase Ritonõpo a popyra ehtoh wino,
17 Yrome seromaroro tapiakase mase,
18 Tomeseke exiko imehnõ nekarory anapoipyra oehtohme zae ehtoh tyoromatohme;
19 Ãkorehmane kohmary oya anakorehmara mana.
20 Ikohmamyry poko penetara exiko, ahno tõ enahtoh poko.
21 Etuarimãko mase popyra oehtoh pokoino.
22 “Jamihme kuhse Ritonõpo mana!
23 Ritonõpo onynamotomasaromepyra sytatose.
24 Sero nono põkõ emero Ritonõpo eahmãko mã toto inyriry poko.
25 Amekeino inyriry enẽko sytatose, emero porehme.
26 Ritonõpo imehxo kuhse mana.
27 “Tuna onuhmapõko mana nono poe esaka.
28 Akurũ poe konopo oehnõko mana, nono ehxikatohme, ahno maro, enara.
29 Akurũ tõ ytory waro pyra sytatose.
30 Sapararahme nenenehkane aropõko Ritonõpo mana tomye.
31 Moro sã tonahsẽ ekarõko Ritonõpo mana ahno a otuhtohme tuesapare ehtohme.
32 Nenenehkane apoĩko mana tomary ke topohme aropotohme tuotoh pona.
33 Konomeru mã enaroximãko tyryrykane jamihmã oepyry poko,