1 “Jomihpyry etapoase ya ro imepỹ nohpo onenepyra jehtohme ipoko ipenetaryino.
2 Moro jomihpyry omipona pyra toehse jahtao, oty rĩko Ritonõpo Jamihmehxo Exikety nae juãnohtohme?
3 Popyra ehtoh enehpõko mana, iiryhmatoh roropa popyra exiketõ wãnohtohme.
4 Ynyriry emero waro Ritonõpo mana.
5 “Popyra ehtoh poko exipitopyra exiase,
6 Jukukuru se ase Ritonõpo a ikuhtoh ajohpe pyra exikety ke.
7 “Zae ehtoh poko turumekase ahtao ya, iirypyryme jehtoh poko typenetase jahtao imepỹ kyryry tapoise ahtao ya,
8 ah imehnõ notuhno toto ynarykahpyry epery poko.
9 Typenetase jahtao imepỹ pyty poko,
10 moro sã jahtao ah ypyty imepỹ namotome nexino.
11 Moro popyra ehtoh tyrise ahtao ya,
12 moro rypyry apoto konõto sã exiry, tapyi zatyry samo, popyra ipunaka, ỹkyryry tõ kurã emero enahkatohme.
13 “Tykerekeremase jahtao ypoetory a zae oturuase imaro moro kurãkatohme atae yna ehtohme.
14 Moro sã pyra jahtao otara ykary Ritonõpo a tapiakase jahtao eya?
15 Ritonõpo ro, Yrihpono ypoetory tõ Rihpõme roropa mana.
16 “Tymõkomokãkara anakorehmakehpyra exiase, pytỹpo tõ roropa ixitarykohtao aetuarimarykohtao.
17 Toiroro otuhpyra exiase,
18 Toto pyno exiase ypoenõ pyno jehtoh samo,
19 Ahno eneryhtao ya orihnõko, kuenime toehse exiryke, tupoke pyra axitunety ke exiryke,
20 upo axitunety ekaroase eya kaneru hpoty risemy, jeky tõ poe.
21 Poetõpo tyyryhmase ahtao ya takorehmase jahtao juize tomo a,
22 ah japory tõ tytahkase nexino,
23 Morohne onyripitopyra exiase juãnopyry Ritonõpo a zuno jexiryke,
24 “Uuru onyripitopyra exiase Ritonõpo myakãme, ipoko penetatohme orẽpyrahxo jehtohme.
25 Epyrypapitopyra exiase itamurume tineru esẽme jehtoh poko, itamurume tineru apoiry poko roropa ya.
26 Xixi enease saereme ahtao, nuno roropa enekure kapu kuroko aytoryhtao,
27 yrome toto oneahmapitopyra exiase ukurohtao ro, tokare pyra roropa.
28 Morohne tyrise ahtao ya iirypyryme jexiry Ritonõpo Imehxo Exiketyme pyra ekaroryke ya,
29 “Atãkyemapitopyra exiase jepetõkara etuarimary poko, mokaro ryhmatopõpyry poko roropa.
30 Oturupitopyra exiase Ritonõpo a mokaro etapapotohme.
31 “Ypoetory tõ zuaro mã toto imehnõ toahmase
32 Imepỹ nono poe aepyhpyã jarao onynomopyra exiase osema tao ẽmehtohme,
33 Azahkuru jehtopõpyry ononẽpitopyra exiase, imehnõ sã pyra.
34 Imehnõ omiry zuno pyra exiase;
35 “Jomiry etary sehxo hano imehnomo a!
36 Morohne yriry ymotary po epyrypakety samo,
37 Ritonõpo a ynyrihpyry emero ekarory, ẽpataka xikihme jexiry, ihximyra, tupuehme kara.
38 “Ynonory onematonanohpyra exiase esẽ wino.
39 otyro epery tonahse ahtao ya topehke pyra,
40 ah omoxino tõ nahtano tiriiku myakãme, ãtarykahme roropa sewata myakãme.”