1 Mame Eripaze, Temã pono tõturuse ropa, ynara tykase:
2 “Ahno tuarohxo ahtao ro ipunaka, Ritonõpo akorehmaneme ehsaromepyra mana.
3 Tãkye exĩko Ritonõpo Jamihmehxo Exikety nae ajohpe pyra ehtoh poko awahtao?
4 Awãnopyryhtao Ritonõpo a, okohmaryhtao apiakatoh taka, Ritonõpo eahmaryke oya awãnohnõko nae? aomiry omipona oexiryke roropa?
5 Arypyra. Tyyrypyhpyke oexiryke pitiko rokẽ pyra, onyrihpyry tõ popyra ikuhpỹme roropa exiryke, awãnohnõko Ritonõpo mana.
6 Axĩtao rokẽ otinerũ mekaroase imehnõ ononory põkomo a repe,
7 Tuna onekaropyra mexiase tapotũkehse exiketomo a,
8 Ajamitunuru ke, imehxo oexiryke roropa nono esẽme toehse mase.
9 Poetõpo tõ winoino ijamitunuru tomatonanohse oya,
10 Morara exiryke seromaroro popyra ehtoh tuhke ãpurũko mana,
11 Tykohmãse opona, osenuhmasaromepyra mexino,
12 “Ritonõpo kaehxo mana kapu ao;
13 Yrome ekaropõko mase:
14 Jo, kuenesaromepyra xine Ritonõpo ekarõko mah akurũ xinukutumãkõ pokoino, kapu kuroko aytoryhtao?
15 “Popyra exiketõ esemary ae oytory se hma?
16 Mõtoino rokẽ toorihse toh nexiase, tarose samo tuna zueme exikety a.
17 Ynara tykase toto Ritonõpo a:
18 Yrome Ritonõpo a, popyra exiketõ tapyĩ tõ pehme tyrise mõkomo kurã ke,
19 Popyra exiketõ enahkary eneryke zae exiketomo a
20 popyra exiketõ mõkomory enahkary eneryke tyya xine.
21 “Jo, osepeme exiko Ritonõpo maro,
22 Otatõme exiko ãmoreparyhtao Ritonõpo a,
23 Oeramary ropa ahtao Jamihmehxo Exikety a oesekumuru po, popyra ehtoh enahkaryhtao oya atapyĩ tao emero porehme,
24 otinerũ uuru tõkehko pyno nymyry pyra awahtao, morohne tomase ahtao oya nakuaka,
25 Ritonõpo Jamihmehxo Exikety uurume sã exĩko mã oya, parata kurãme sã roropa itamurume oya exĩko mana.
26 Morarame atãkyemãko mase Ritonõpo poko,
27 Õtururu eya etãko mana,
28 Onyriry tõ emero kure rokẽ exĩko mana.
29 Epyrypaketõ ime pyra tyrĩko Ritonõpo mana.
30 Opynanohnõko Ritonõpo mana popyra ehtoh poko pyra awahtao, zae ehtoh poko rokẽ exikehpyra awahtao.”