1 Mame Zopaa, Naama pono tõturuse, ynara tykase ynororo:
2 “Mose Jo sekere kary onezuhsaromepyra sytatou?
3 Jo, onezuhsaromepyra yna ekarõko mah?
4 Õsenetupuhtoh zae rokẽ ekarõko mase.
5 Ritonõpo otururu etary se ase,
6 Ãmorepary roropa tuaro ehtoh poko, tokare pyra ro ahtao ro, itamurume zuaro ehtoh nae ro mana.
7 “Imehxo Ritonõpo ehtoh tonẽse mana.
8 Kapu atapurupyra mana Ritonõpo omõpyra ehtohme.
9 Sero nono zumo ehtoh motye mana,
10 Toytory se Ritonõpo ahtao ahno apoise arotohme apiakatoh taka,
11 Ahno tõ popyra exiketõ waro Ritonõpo mana;
12 Jumẽta ona pono emũkuasaromepyra mana ikuremahpyryme exikety.
13 “Jo, okurohtao eramako ropa Ritonõpo a.
14 Onyriry xihpyry irumekako.
15 Morararo ehxiropyra exĩko mase,
16 Wenikehnõko mase oetuarimatopõpyry poko, zueme tuna ehtopõpyry samo.
17 Mame isene oehtoh saereh ãko mana xixime ehtoh samo tãxiahtao.
18 Towomaneke exĩko mase, torẽtyke pyra,
19 Enaromyra exĩko mase imehnõ poko, õseremaryhtao.
20 Yrome popyra exiketõ tỹkakoxi osenuhmãko mã toto, enaromỹke,