1 Enekure mase, kuku, jenuru zamaro mase!
2 Ozery karimutume mana, kaneru tõ samo ihpoty tysahkase ahtao, ikurikasenãme toto ahtao.
3 Opotapihpyry kamirarame mana,
4 Opymyry enekure mana, tuisa Tawi namohpyry kaetokohxo exikety samo,
5 Amanatyry asakoro kapau poenõ kamarame exiketõ sã mana,
6 Ytõko ase ypy mira pona, ypy ixtaratu tõ pona,
7 Oryxime mase, kuku, jenuru zamaro mase!
8 Eropa ymaro, kuku, ypytyme exikety, ypy tõ Ripano poe.
9 Kuku, opyno ase ipunaka, toiro jeneryhtao oya
10 Kure kuhse ya ypyno oehtoh mana, kuku, ynymenekahpyry ypytyme!
11 Opotapihpyry anusasame mana ano zeni samo.
12 Kuku, tupito arykahpyry sã mase,
13 Moroto otupi po sã otyro kure ahtãko mana;
14 asaparão nae, kanera te, jasamĩ ezuezumano,
15 Tuna enatyryme mase utupi po, tuna kurano, iporiryme tururume yhtõko ypy Ripano poe.
16 Owõko tyryrykane inikahpozakoxi!