1 Biyö́n quézituʼ le, Dios.
2 Bulaga cazuʼ Liʼ bönachi yuguʼ yödzö izáʼa,
3 Bitiʼ gulaʼdéliʼnëʼ xuz xtóʼotuʼ luyú ni rácasö quégaquiëʼ,
4 Naca cazuʼ Liʼ Dios quiaʼ, en Nu rinná beʼe nedaʼ.
5 Uguntuʼ dxin yöl-laʼ huáca quiuʼ, uxícjatuʼ nupa taʼdáʼbagaʼ netuʼ,
6 Bitiʼ uzxöni ládxaʼa uxitiʼ yaga quiaʼ,
7 tuʼ rusölá cazuʼ Liʼ netuʼ lu náʼagaca nupa bitiʼ taʼléʼe netuʼ dxiʼa,
8 Cúʼuticaʼstuʼ Liʼ yöl-laʼ ba,
9 Pero naʼa nusán noʼo netuʼ, Dios, en bëʼu lataj nu buxicja netuʼ.
10 Benuʼ ga buzxúnnajtuʼ lógaca nupa taʼdíl-lalen netuʼ,
11 Bëʼu lataj gulútiëʼ ziantuʼ ca nu rúti-gacabaʼ böʼcuʼ zxilaʼ.
12 Naca tsca bë́tiʼu netuʼ, en látiʼdoʼos guzxiʼu.
13 Bönachi yuguʼ dzaga yödzö queë́tuʼ bilaʼléʼe lë naʼ benuʼ queë́tuʼ,
14 Benuʼ ga tuʼdidzaʼ yudxi bönachi yuguʼ yödzö netuʼ.
15 Yuguʼ dza rutuíʼidaʼ ca raca queë́tuʼ,
16 tuʼ riyöndaʼ nupa tuʼdidzaʼ yudxi nedaʼ, en tuʼcáʼana nedaʼ cáʼasö,
17 Guca queë́tuʼ yúguʼtë lë ni sal-laʼ bitiʼ nál-la ládxiʼtuʼ Liʼ,
18 Bitiʼ caʼ böaj ládxiʼtuʼ ca réajlëʼëtuʼ Liʼ,
19 pero nusán naʼ cazuʼ netuʼ ladaj nupa nácagaca ca yuguʼ böaʼ guiʼa síniaʼ,
20 Laʼtuʼ gul-la ládxiʼtuʼ Liʼ, Dios queë́tuʼ,
21 laʼ gáquibeʼetënuʼ lë ni, Dios,
22 Tuʼ néquituʼ quiuʼ Liʼ zóaticaʼsö nu guti netuʼ.
23 ¡Bubán, Xan! ¿Bizx que rásitsoʼ Liʼ?
24 ¿Bizx que nucachiʼ loʼ lotuʼ netuʼ?
25 Naguíngaquiëʼ netuʼ luyú.
26 ¡Gudáchi gácalenuʼ netuʼ,