1 Ñasiꞌi ndichi, chi saꞌa maa ña veꞌe ña.
2 Ñayiu jika ndaa, chi yuꞌu niꞌnui Jitoꞌo.
3 Yuꞌu ñayiu vasa kana tnoꞌo teyii ja saꞌa kueꞌe ña jin.
4 Nuu tu na isndiki ka oo, te tu na triu ñuꞌu nuu saka.
5 Testiu ndaa, chi ma kaꞌan tnoꞌo de.
6 Ñayiu kuasun ini, chi ndukui tnoꞌo ndichi, su tu niꞌi.
7 Kujioo jika ni nuu oo ñayiu vasa,
8 Chi tnoꞌo ndichi ñayiu niꞌnu ini kuu ja jinkuiꞌnu inio ichi jikai.
9 Ñayiu vasa, chi ka saꞌa kuasuin yika kuechi ka saꞌi.
10 Te in in maa ñayiu, chi ka jini tnoꞌo suchi ini ka tnaꞌi nuu anui,
11 Te veꞌe ñayiu kueꞌe, chi naa.
12 Ka oo ichi ja ka ndakani ini maa ñayiu ja ichi ndaa kuu.
13 Te vi ndee ja jaku sii ñayiu uꞌu anui,
14 Ñayiu vasa, chi kusii ini jin nagua saꞌi,
15 Ñayiu tu jini nagua kuu, chi ndiꞌi ni tnoꞌo ka kaꞌan ñayiu kandijai.
16 Ñayiu ndichi, chi yuꞌu niꞌnui ia Dios, te kujioi nuu jakueꞌe.
17 Ñayiu ñama kiti ini, chi nani guaa kuu ja tu jiniuꞌu saꞌi.
18 Ñayiu tu ka jini nagua kuu, chi ka saꞌa jajin tniuu vasa.
19 Te ñayiu kueꞌe, chi ka jaꞌnu jiti nuu ñayiu guaꞌa.
20 Te ñayiu kundaꞌu, chi vi ndee ñayiu ndeka tnaꞌa guaꞌa ka jin skexiko ña.
21 Ñayiu skexiko tnaꞌa kuikin, te saꞌi yika kuechi.
22 Naa ndoñuꞌu ñayiu ndakani ini ja saꞌi jakueꞌe.
23 Nuu satniuu ndee ñayiu, te niꞌi guaꞌi.
24 Ñayiu ndichi, chi ja kuika nevaꞌi kuu na kuinio in jayiñuꞌu ja ni ndukutui.
25 Testiu ndaa, chi skaku niꞌnu de ñayiu.
26 Nuu yuꞌu niꞌnuo Jitoꞌo, te kukanu ndaa inio ja oo guaꞌo,
27 Nuu ka yuꞌu niꞌnuo Jitoꞌo, te taa ja vi kotekuo,
28 Nuu tatnuni in rey nuu kuaꞌa ñayiu, te oo jayiñuꞌu nuu de.
29 Ñayiu kuekuee kiti ini, chi jinkuiꞌnu guaꞌa ndevaꞌa ini.
30 In ñayiu osii ini, chi ovaꞌi jin yiki kuñui.
31 Na ñayiu saꞌa ndevaꞌa ña jin ñayiu kundaꞌu, te jiñaꞌi ja kanoo ia ni saꞌa ña jin.
32 Ñayiu kueꞌe, chi kanakaui nuu maa jakueꞌe saꞌi yun.
33 Nuu anu ñayiu jinkuiꞌnu ini oo tnoꞌo ndichi.
34 Ñayiu saꞌa ndaa, chi ka saꞌa kaꞌnui ñuu kaꞌnu mai.
35 Tee jinokuechi ja jinkuiꞌnu ini, chi kaꞌan ndaꞌu kaꞌan kee ña rey jin de.