1 Baana banje, mu̱u̱ghu̱we ebi si̱ye eseenu̱we nkwete kubahabula,
2 Ebi nkwete ku̱beegheesi̱ya bisemeeye,
3 Obu naanabaagha mwana,
4 tita akanjegheesi̱ya naaghila ati,
5 Obe mugheji kandi weetegheeleli̱ye,
6 Otalu̱ghʼo magheji, ghakukulinda.
7 Kintu kikulu eki obhonganuuwe kukola ni kutunga magheji.
8 Kaakuba okunda Wamagheji kandi omwebohelʼo bhyani,
9 Aku̱ku̱lu̱wi̱ka haa mutuwe sipeewa ya bimole,
10 Mwana wanje, otegheeleli̱ye kandi osi̱i̱me ebi nkwete kukughambila,
11 Naakwegheseei̱ye ngoku okuba mugheji
12 Nuwaabaaye noolubhatanga taaliyo ekikukutanga
13 Bwile bwona oosukaghe ebi weeghi̱ye,
14 Otakola bintu ebi bantu babhi bakukolagha
15 Otabyeli̱li̱kanʼo, otabikola,
16 Bantu babhi tabakughwesaghilagha ku̱hi̱ki̱ya bakoli̱ye kintu ki̱bhi̱i̱hi̱ye.
17 Babbali̱ye kukola bintu bi̱bhi̱i̱ye kandi katabanguko,
18 Kihanda kya bahi̱ki̱li̱i̱ye kili nga musana ghukwete kutuwa,
19 Bhaatu kihanda kya bantu babhi kili nga mweli̱ma ghwonini.
20 Mwana wanje, ooghu̱we bighambo byanje
21 Otabiibululuwa, ookalaghe noobiisuka
22 Bikuha bwomi̱i̱li̱ abakubitunga
23 Olinde mutima ghwawe kusaali̱ya bintu byona,
24 Otabu̱ghagha bisubha
25 Ololaghe tonono hambali okwete kughenda,
26 Kyona eki okubbala kukola odu̱bhaghe okyeli̱li̱kanʼo bhyani,
27 Weetantale kukola bintu bi̱bhi̱i̱hi̱ye