1 Mpo Kotio, are ti Variqavanoma variaro. Te ai vataake vairerave tivakehama ai rante vauro.
2 Mpo, are ti qaqi kairaqe te ai Naavuqi turuaraini vaiha ai mpeqa okaravano takuqi vainara ho tavaare.
3 Te tenta qaqi variqi vuainarara kia noraiqaake iriraiti, ai muntukavano tiriara vaira virara te noraiqaake iriqi virerave.
4 Te maa vataraqaa qaqi variqi vuaina entara ariara koqeve tivaqi virera.
5 Vaiintivano koqe kara nero ho vaintemakero, ti maraquravano quahe vairaqe te ihi tiha ai autu tuaheraqi virera.
6 Te tenta vaite vauna taintaraqaa vaiha, ariara kia tauru karaiti, qaqi iriqi vi vaunara.
7 Are ti kahaqama timite variarava varianarara ti, kokoraara naativano nai nora arokaqi vaintemake, te ai aaqanto vaiha, ai quahama amitaaina ihira tivaqi virera.
8 Te ai aaqanto vauraro ai kauqu tanaravano ti tuataimanta vaunarave.
9 Oho, ti haru kareka auti variaka, vika vehiqamavi, qutu vuaka varianaini otu vaivara.
10 Iqoka paipevano vika aru kairamanta qaakau vairivano vika vaata nevarave, turo.
11 O Kotio, are ti avuhainaa vaiinti kahaqi variaramanta te navutaaka naatarake vaunarara ti, te quaheha variqi virerave.