1 Masi cahã ka šelaŋ,
2 Almuraadu boobo ga kate boro ma handiri,
3 Nda nʼna meefur zaa Irkoy se, masi gay manʼa kaa,
4 Masi meefur zaa baa ma ne
5 Masi naŋ ni miɲoo ma ni kul tee zunubante,
6 Zama nda handiri boobo kokoroo ti yaada,
7 Nda ni dii ganda kaŋ ra i ga talka šiita, i si yadda cimi nda šerretaray ga, hayaa masi ni boŋoo haw,
8 Nafaw no ganda se a ma duu kokoy
9 Boro kaŋ ga baa nooru si kungu a ra,
10 Nda alman boobo, nga ŋaakey ga boobo,
11 Goykaw jirboo ga kom,
12 Ay dii haya futu beeri foo waynaa cire
13 Goy yaamu no kaŋ ga almanoo din derandi.
14 Takaa kaŋ nda a fatta ɲaŋoo gundoo ra gaa koonu,
15 Woo mo manʼti kala haya futu beeri.
16 A ga nga zaarey kul wii kubawey ra,
17 Hayaa kaŋ ay dii a kaŋ ga boori, a ga hennay adamize se manʼti kala a ma ŋaa, a ma haŋ ka dii gomni nga taabiyanoo kul ra kaŋ a gʼa tee waynaa cire, aloomuroo ra kaŋ Irkoy nʼa noo a se, zama woo ti nga bagaa.
18 Boro kul kaŋ Irkoy nʼa noo alman nda arzaka, kʼa noo a ma huna i ra, ka nga bagaa zaa, ka ɲaali nda nga goyoo, woo manʼti kala Irkoy nooyan.
19 Kullihinne Irkoy ga adamize binoo too nda ɲaali, a si hongu boobo kaŋ nga aloomuroo si kuu.