1 Sing langa God gudbinjiwei!
2 Stadimap det myusik. Plei det lilwan dram.
3 Blowim detlot hon blanga abum det dubala serramoni blanga nyumanth en wen im fulmun.
4 Dijan na det lowa blanga Isreil,
5 Imbin gibit det lowa langa detlot Isreil pipul wen imbin deigimwei olabat brom Ijip.
6 “Aibin deigimwei ola hebiwan loud brom yumob bekboun, ol detlot brabli adwek langa Ijip.
7 Wen yumob bin abumbat trabul, yumob bin jingat langa mi en aibin seibum yumob.
8 Main pipul olabat, lisin langa main woning!
9 Yumob nomo lau weship eni drimin.
10 Mi na YAWEI det trubala God blanga yumob hubin bringimat yumob brom Ijip.
11 “Bat main pipul olabat nomo bin lisin langa mi.
12 Aibin lafta larram olabat dum wanim deibin wandim dum dumaji olabat nomo bin wandim lisin langa mi.
13 Brabliwei ai wandim main pipul olabat blanga lisin langa mi.
14 ai bina bidim olabat enami kwikbalawei.
15 Detlot hu nomo laigim mi garra nildan bradinwei langa mi,
16 Bat if yumob teiknodis langa mi ai garra meigim yumob brabli bulap binji garram ola brabli gudwan sid daga en brabli switwan shugabeig.”