1 Mi brabli nogudbinji en mi wandim God blanga album mi.
2 Wen ai abum trabul, ai jingat langa YAWEI.
3 Wen mi jinggabat main God, mi wori,
4 Ai kaan jadimap main ai dumaji yu na kipum mi weik.
5 Mi jinggabat blanga wanim bin hepin bifo,
6 Mi jinggabat ola song naitaim,
7 “Maitbi det Bos garra oldei nokambek wi?
8 Maitbi imbin stap laigimbat wi?
9 Maitbi imbin kipumbek det kainbala filing blanga im dumaji im wail langa wi?”
10 Afta na aibin tok miselp, “Dijan na meigim mi brabli nogudbinji.
11 YAWEI, ai garra jinggabat blanga ola haibala ting yubin oldei dumbat.
12 Ai garra jinggabat ebrijing yubin oldei dum.
13 Det wei blanga yu main God im holiwan.
14 Yu na det God hu oldei dum olkain ting garram yu pawa.
15 Garram yu pawa yubin seibum ol yu pipul olabat,
16 God, wen ola woda bin luk yu deibin ol bradin,
17 Ola klaud bin meigim rein buldan,
18 Det nois blanga yu thanda bin jidan langa det wiliwili,
19 Yubin wok rait thru det solwoda.
20 God, yubin lidim yu pipul olabat jis laiga stakmen wen yubin pikimat Mosis en Eran blanga lidimbat yu pipul olabat.