1 YAWEI, yu seibum mi brom ola brabli nogudbala pipul.
2 Dei oldei jinggabat blanga dumbat nogudbala ting.
3 Dei tok nogudwan wed en im jis laik det poisin blanga jigiwan sneik.
4 YAWEI, yu lukaftum mi brom detlot brabli nogudwan pipul,
5 Detlot praudbala pipul bin meigim trep blanga mi.
6 Mi tok langa YAWEI, “Yu main God.”
7 YAWEI, main boswan God,
8 YAWEI, nomo gibit detlot brabli nogudbala pipul wanim dei wandimbat.
9 Nomo larram main enami olabat win.
10 Larram brabli hotwan eshis buldan langa olabat.
11 Larram ol detlot pipul hu bleimbat najalot pipul jis fo najing nomo abum enijing gudwan hepin langa olabat.
12 YAWEI, ai sabi yu maindimbat ola powan pipul,
13 Detlot pipul hu jidan raitwei langa yu garra preisim yu brabli trubalawei orait.