1 God, mi preisim yu.
2 Ola brabli nogudbala en laiyinbala pipul bin meigim trabul blanga mi.
3 en olabat oldei toktok brabli nogudbalawei blanga mi.
4 Nomeda olabat oldei wandim blanga ardim mi bat stil mi laigim olabat,
5 Nomeda aibin dumbat ola gudbala ting blanga olabat, bat stil dei oldei dumbat nogudbala ting langa mi.
6 YAWEI yu garra pikimat nogudwan jadj blanga kotim main enami,
7 Yu meigim im jidan gilti,
8 Meigim im laif binijap,
9 Meigim im biginini olabat jidan nomo garram enibodi,
10 Meigim im biginini olabat wokaranbat en askimbat blanga enijing.
11 Meigim detlot pipul weya im owim mani, deigimwei ola ebrijing brom im,
12 Nomo larram enibodi kain langa im,
13 Meigim ol im femili olabat binijap,
14 YAWEI, yu garra oldei jinggabat ol detlot nogudbalawei blanga im grengrenfatha olabat,
15 YAWEI, yu garra oldei jinggabat ola nogudbalawei blanga olabat,
16 Det men na nomo bin jinggabat blanga jidan kainbala.
17 Imbin oldei laigim toktokbat nogudbalawei langa najalot pipul.
18 Imbin laigim toktokbat nogudbalawei ebridei, jis laik imbin oldei laigim werrimon klos, en dagadagat daga en dringgimbat woda ebridei.
19 Larram ol im nogudbala wed gobek langa im igin en gaburrumap im jis laik klos en jidan raidaran im wulijim belt.
20 YAWEI, yu panishim main enami olabat lagijat na,
21 YAWEI main boswan God, yu album mi laik yubin pramis blanga dum.
22 Mi powan en nomo garram enijing.
23 Jis laik det san weya im godan, wal lagijat na mi gulijap binij.
24 Main dubala ni brabli wikwan brom det taim weya ai nomo bin dagadagat daga,
25 Wen pipul luk langa mi, olabat laf langa mi,
26 YAWEI main God, album mi.
27 Yu meigim main enami olabat sabi yu na seibumbat mi.
28 Dei gin tok nogudbalawei langa mi bat yu na garra oldei dum gudbala ting blanga mi.
29 Meigim main enami olabat sheim miselp brabliwei.
30 Ai garra oldei gibit theingks langa YAWEI brabliwei.
31 dumaji im oldei maindimbat ola powan pipul,