1 ثَاژَادْجِيثْ ن حَابَاقُّوقْ، أَنَابِي، ذڭْ وَاطَّاسْ ن ثْمِيجِّيوِينْ.
2 أَ سِيذِي، ؤُمِي سْڒِيغْ ڒخْبَارْ نّشْ،
3 أَربِّي يُوسَا-د زِي ثَايْمَانْ ؤُ أَمْقدَّاسْ
4 ثُوغَا ذِينْ إِشْثْ ن ثسِّيقْثْ أَمْ ثْفَاوْثْ،
5 طَّاعُونْ إِتِّيزْوَارْ إِ وُوذمْ نّسْ،
6 نتَّا إِكَّارْ ؤُشَا يَارَّا ثَامُّورْثْ ثتّنْهزَّا،
7 نشّْ ژْرِيغْ إِقِيضَانْ ن كُوشَانْ تّْوَاحْصَارنْ،
8 مَا يَارْغَا وغْضَابْ ن سِيذِي خْ إِغزْرَانْ؟
9 ڒْقوْسْ نّشْ إِتّْوَاعَارَّا مَارَّا،
10 ڒَامِي شكْ ژْرِينْ إِذُورَارْ، إِڒْقفْ إِ-ثنْ ڒوْجعْ،
11 ثَافُوشْثْ، ؤُڒَا ذ ؤُيُورْ،
12 س وسْخضْ ثصُّورُوفذْ ثِيوَا إِ ثمُّورْثْ،
13 شكْ ثفّْغذْ إِ ؤُسنْجمْ ن ڒْڭنْسْ نّشْ،
14 أَزدْجِيفْ ن إِعسْكَارِييّنْ نّسْ إِمزْوُورَا،
15 أَكْ-ذ إِيْسَانْ نّشْ ثطّْفذْ أَبْرِيذْ ذِي ڒبْحَارْ،
16 ڒَْامِي سْڒِيغْ، يَارْجِيجْ ؤُعذِّيسْ إِنُو.
17 وَاخَّا وَارْ إِتّْنُووَّارْ وَارْثُو،
18 عَاذْ أَمنِّي نشّْ أَذْ سْڒِيوڒْوغْ إِ سِيذِي،
19 سِيذِي، سِيذِي إِنُو، نتَّا ذ جّْهذْ إِنُو.