1 Salbamaj Tayta Dios, chacaypa junajpapis
2 ¡Mañacamushäta wiyaycamay ari!
3 Fiyupa mana allimanmi chayashcä.
4 Nogapäga wañushapänönami yarparcaycanpis.
5 Wañushanönami caycäpis.
6 Nogataga jitarpamashcanqui mas rurinnin uchcumanmi,
7 Rabyashayquitami nogacho päsacächishcanqui.
8 Gammi camacächishcanqui amïgöcunapis jaguiycamänanpaj.
9 Wagaycällarnami gaprayaycäpis.
10 ¿Wañojcunaga ricangachuraj milagruta rurashayquita?
11 ¿Sepultürachöga cuyacoj cashayquita willanacunmanchuraj?
12 ¿Fiyupa yanauyaycaj chacaycho musyanmanchuraj milagrucunata rurashayquita?
13 Nogami ichanga Tayta Dios gamllata gayacaycämö.
14 Tayta Dios nogataga ¿imanirtaj manacajman churamanqui?
15 Wamra cashäpita-pachami nogaga fiyupa llaquicullar goyashcä.
16 Rabyawan ñacachimashayquimi nogataga chayamasha.
17 Ñacaymi imay örapis tumapaycäman aypalla yacu jundir ñitiycämajno.
18 Nogapitaga gargushcanqui amïgöcunata yan'guëcunatapis.