1 Tayta Dios, ¿imanirtaj para-simriga nogacunata jitarimashcanqui?
2 Acrashayqui runacunapäga yarpaycuy ari.
3 Juchusha ragällan caycajta ricaj shamuy ari.
4 Chiquishojcunaga wasiquichömi cushicur gaparpasha.
5 Yantata mutojnöpis
6 Martilluwan jächawanmi illgächisha guerucho cuyayllapaj burdasha caycajcunata.
7 Wasiquitaga manami rispitashachu.
8 Nogacunapäga «ushajpaj illgarachishun» niranmi.
9 Bandëräcunapis mananami ichirpannachu.
10 Tayta Dios, ¿imaycamaraj wiyächipämanga chiquimajcunaga?
11 ¿Imanirtaj manana yanapämanquinachu?
12 Unaypitapis gamllami nogacunapaga Raynë canqui.
13 Lamar yacutapis munayniquiwanmi ishcayman raquirirayqui.
14 Waräcuy Leviatanpa umantapis llapirishcanquimi.
15 Gammi pashtachimushcanqui pucyutapis, yacutapis mayu cananpaj.
16 Gampa munayniquichömi caycan junajpis chacaypis.
17 Gammi señalashcanqui maycama mundu cananpäpis.
18 Tayta Dios, ama gongaychu chiquishojcuna gayapäshushayquita,
19 ¡Nogacunataga pasaypa ama gongaycamaychu!
20 Yarpäriy parlacur aunishayquita.
21 Ñacaycajcunata pengayman churanantaga ama dëjaychu.
22 ¡Apuray Tayta Dios! ¡Munayniyoj cashayquita musyachiy!
23 Ama gongaychu chiquishojcuna washayqui rimashanta.