1 Llapayqui wiyaycäriy.
2 Sumaj wiyay rïcucunapis, pobricunapis.
3 Yarpachacuycurmi rimamushaj.
4 Sasa tantiyaypaj cajcunatami rimashaj.
5 Nogaga manami mancharishächu llaquicuycuna chayamuptinpis.
6 Conträcunaga yäracun ima-aycatapis charashallanmanmi.
7 Chayno cashpanpis Tayta Diostaga manami päganmanchu para-simri cawananpaj.
8 Runacuna bïdanta rantinanpäga manami ayca guellaypis aypanchu.
9 Runaga para-simri manami cawanchu.
10 Ricashanchïnöpis llapanmi wañun.
11 Chacrancunata quiquinpa jutinta churapasha captinpis,
12 Runaga may-jina rïcu carpis manami para-simriga cawanchu.
13 Chaynömi wañun quiquillanman yäracojcunaga.
14 Chay runacunaga carcaycan michejta gatiraj uyshanömi.
15 Nogatami ichanga wañuypita Tayta Dios salbamanga.
16 Pipis rïcuyaptin,
17 Wañorga manami ima-aycantapis apangapächu.
18 Cawar cushisha goyaptin, rïcu captin runacuna alabaptinpis
19 imayllaga wañongami.
20 Runaga may-jina rïcu carpis para-simriga manami cawanchu.